ირაკლი კობახიძის განცხადებით, "საბჭოური მიდგომაა" ლუქსემბურგში ევროკავშირის საგარეო საქმეთა მინისტრთა შეხვედრაზე ოცნების ხელისუფლების საგარეო საქმეთა მინისტრის, მაკა ბოჭორიშვილის არ მიწვევა.

"ეს არის საბჭოური მიდგომა, როდესაც არ უნდათ ლაპარაკი, კომუნიკაცია. რაც შეეხება ევროპასა და დაკავშირებადობის საკითხს, ევროპა მაქსიმალურად უნდა იყოს, თუ ობიექტურ ინტერესებზეა საუბარი, დაინტერესებული, რომ მაქსიმალურად გაჭრას ახალი ხაზები ეკონომიკური თვალსაზრისით.

ამ ფონზე, როდესაც საქართველოს არ პატიჟებენ მინისტრის დონეზე, რომელიც არის ერთ-ერთი საინტერესო ქვეყანა სწორედ დაკავშირებადობის კუთხით, თავისი გეოგრაფიული პოტენციალიდან, ადგილმდებარეობიდან გამომდინარე და როდესაც ასეთი ქვეყნის საგარეო საქმეთა მინისტრს არ იწვევ, ეს ყველაფერზე მეტყველებს. ეს მეტყველებს, რომ ევროპული ბიუროკრატია ვერ მოქმედებს ევროპის ობიექტური ინტერესების შესაბამისად," — განაცხადა ირაკლი კობახიძემ.

ცნობისთვის, 20 ოქტომბერს, ლუქსემბურგში ევროკავშირის საგარეო საქმეთა მინისტრთა შეხვედრაზე ოცნების საგარეო საქმეთა მინისტრი, მაკა ბოჭორიშვილი არ მიიწვიეს. გუშინ, "რადიო თავისუფლების" ევროპის ბიუროს რედაქტორმა, რიკარდ იოზვიაკმა X-ზე დაწერა, რომ საქართველო ელჩის დონეზე წარდგება შეხვედრაზე.

მოგვიანებით უწყებაში განაცხადეს, რომ საქართველო ელჩის დონეზეც არ წარდგება შეხვედრაზე, რადგან მათი განცხადებით "საქართველოს როლიდან გამომდინარე, მინისტრების შეხვედრაში საქართველოს ელჩის დონეზე მიწვევა მიუღებელია და გაუგებარია ამგვარი მიდგომის საფუძველი და მიზეზი".