ლიეტუვა ევროკავშირის დედაქალაქებს "გადამწყვეტი ნაბიჯების" გადადგმისკენ მოუწოდებს, რათა უკრაინის განაცხადი ევროკავშირის წევრობაზე "რეალური და შეუქცევადი" გახდეს.

ამის შესახებ წერია ვილნიუსის წერილში, რომელიც ევროკავშირის ქვეყნების დედაქალაქებში გაიგზავნა. ინფორმაციას ამის შესახებ უკრაინული მედია ავრცელებს.

წერილი გასულ კვირას ევროკავშირის დედაქალაქებში, ევროკავშირის საგარეო საქმეთა მინისტრების არაფორმალურ შეხვედრამდე გაიგზავნა. წერილში აღნიშნულია, რომ მოლაპარაკებების დაწყება გააძლიერებს უკრაინელთა მორალს და წაახალისებს რეფორმებს ქვეყანაში იმ ფონზე, როცა რუსეთი სამხედრო მოქმედებებს აძლიერებს.

წერილში ასევე აღნიშნულია, რომ უმოქმედობამ შეიძლება შეასუსტოს საზოგადოებრივი მხარდაჭერა უკრაინაში და დაასუსტოს ინსტიტუციური ნება რეფორმებისთვის.

ლიეტუვის წინადადება ითვალისწინებს ტექნიკურ დონეზე მოლაპარაკებების დაწყებას უკრაინასა და მოლდოვასთან უნგრეთის გარეშე, თუ 26 წევრი ქვეყანა თანხმობას განაცხადებს. ოფიციალური თანხმობა მოგვიანებით შეიძლება მიიღონ, თუ ბუდაპეშტი შეცვლის პოზიციას ან ხელისუფლებას.