უკრაინის დამოუკიდებლობის 34-ე წლისთავის წინ, 24 აგვისტოს, ევროკავშირმა უკრაინას ურყევი მხარდაჭერის შესახებ კიდევ ერთი ძლიერი სიგნალი გაუგზავნა და ქვეყანას 4.05 მილიარდი ევრო გამოუყო. აქედან 3.05 მილიარდი ევრო "უკრაინის ფონდიდან" (Ukraine Facility) გამოიყო, ხოლო 1 მილიარდი — ევროკომისიის განსაკუთრებული მაკროფინანსური დახმარების (MFA) მეშვეობით. ამის შესახებ ინფორმაციას ევროკომისია ავრცელებს.

ევროკომისიის პრეზიდენტმა ურსულა ფონ დერ ლაიენმა განაცხადა:
"როდესაც უკრაინა აღნიშნავს დამოუკიდებლობის 34-ე წლისთავს, ევროკავშირი მკაფიო მესიჯს უგზავნის: ჩვენი სოლიდარობა უკრაინისადმი ურყევია. დღევანდელი 4 მილიარდ ევროზე მეტი დაფინანსება ჩვენს მტკიცე ერთგულებას უსვამს ხაზს. ეს ახალი დახმარება ამტკიცებს ჩვენს ერთგულებას არა მხოლოდ უკრაინის აღდგენის, არამედ მისი როგორც სუვერენული და დემოკრატიული ქვეყნის მომავლის მიმართ. რადგან როდესაც უკრაინა ძლიერია, ევროპაც უფრო ძლიერია."

ცნობისთვის, უკრაინაში რუსეთის სრულმასშტაბიანი შეჭრის შემდეგ, 2022 წლის თებერვლიდან, ევროკავშირმა და მისმა წევრმა სახელმწიფოებმა უკვე 168.9 მილიარდი ევრო მოაბილიზეს ჰუმანიტარული, ფინანსური და სამხედრო დახმარების სახით.