ამერიკის მთავრობა ახალ საპილოტე პროგრამას იწყებს, რომლის ფარგლებშიც გარკვეული ქვეყნების ვიზიტორებს შეიძლება $5,000-დან $15,000-მდე წინასწარი დეპოზიტის გადახდა მოეთხოვოთ. პროგრამა 20 აგვისტოს ამოქმედდება და ერთი წელი გაგრძელდება. მიზანი ვიზის ვადის გადაცილების შემთხვევების შემცირებაა. ამის შესახებ ინფორმაციას Reuters ავრცელებს.

საკონსულო ოფიცრებს იმ ქვეყნების მოქალაქეებისთვის დეპოზიტის მოთხოვნის უფლება მიეცემათ, სადაც ვიზის ვადის გადაცილების მაჩვენებელი მაღალია ან უსაფრთხოების შემოწმება საკმარისი არ არის. თანხა ვიზიტორს დაუბრუნდება, თუ ვიზის პირობებს დაიცავს და დროულად დატოვებს აშშ-ის.

ეს ინიციატივა ტრამპის ადმინისტრაციის იმიგრაციული პოლიტიკის ნაწილია. 2020 წელს მსგავსი პროგრამა უკვე გამოცხადდა, მაგრამ პანდემიის გამო ვერ ამოქმედდა.

შეერთებული შტატების ტურიზმის ასოციაციის შეფასებით, პროგრამის მასშტაბი მცირე იქნება და დაახლოებით 2,000 აპლიკანტს შეეხება, ძირითადად იმ ქვეყნებიდან, რომლებსაც აშშ-ში მოგზაურობის დაბალი მაჩვენებელი აქვთ.