ბორჯომის რაიონში, წაღვერის ტყეში გაჩენილ ხანძარში ახალი კერები არ შეინიშნება და ქრობის პროცესი კვლავ გრძელდება. ამის შესახებ ინფორმაციას საგანგებო შტაბი ავრცელებს.

შტაბში განმარტავენ, რომ ხანძრის ჩაქრობის სამუშაოებში საგანგებო სიტუაციების მართვის სააგენტოს მეხანძრე-მაშველები, შინაგან საქმეთა სამინისტროს განსაკუთრებულ დავალებათა დეპარტამენტის თანამშრომლები და ეროვნული სატყეო სააგენტოს წარმომადგენლები მუშაობენ. გარდა ამისა, ქრობის პროცესში ჩართულია ათეულობით ხანძარსაწინააღმდეგო ტექნიკა და სამი ვერტმფრენი, მათ შორის ერთი აზრბაიჯანის.

"სპეციალურად შექმნილი საგანგებო შტაბი ხანძრის ქრობის პროცესს ადგილზე ხელმძღვანელობს. პერიოდულად, შტაბის წევრები, სტიქიის ზონაში არსებული ვითარების დეტალურად შესწავლისა და ხანძრის ქრობისთვის ეფექტური გეგმის დასახვა-გაუმჯობესების მიზნით, საკონტროლო შემოფრენებს ახორციელებენ", - აღნიშნავენ საგანგებო შტაბში.

წაღვერის ტყეში ბოლო ერთ თვეში ხანძარი ორჯერ გაჩნდა. ბოლოს ხანძარი 22 სექტემბერს გაჩნდა და მეხანძრე-მაშველები მის ჩაქრობას უკვე მესამე დღეა ცდილობენ.