საგარეო საქმეთა სამინისტრო ჟენევის საერთაშორისო მოლაპარაკებების 36-ე რაუნდთან დაკავშირებით განცხადებას ავრცელებს. უწყების ცნობით, 15 ივნისს, მეორე სამუშაო ჯგუფის ფარგლებში, იძულებით გადაადგილებულ პირთა და ლტოლვილთა დაბრუნების საკითხის განხილვისას, რუსეთის ფედერაციისა და საოკუპაციო რეჟიმების წარმომადგენლებმა დატოვეს მოლაპარაკებების დარბაზი:

"ეს კიდევ ერთხელ უსვამს ხაზს მათ არაკონსტრუქციულ დამოკიდებულებას ადამიანის უფლებებისა და ჰუმანიტარული თემების ისევე, როგორც ზოგადად, მოლაპარაკების პრინციპების მიმართ".

საგარეო საქმეთა სამინისტროს ინფორმაციით, მონაწილეებმა საქართველოდან იძულებით გადაადგილებულ პირთა და ლტოლვილთა დაბრუნების მნიშვნელობაზე ისაუბრეს. უწყების განცხადებით, რუსეთის ფედერაციის მხრიდან ადგილი ჰქონდა საკითხის პოლიტიზებას, გაეროს გენერალური ასამბლეის მიერ იძულებით გადაადგილებულ პირთა და ლტოლვილთა სტატუსის შესახებ რეზოლუციის მიღების საბაბით.

საქართველოს საგარეო საქმეთა სამინისტროს ცნობით, პირველი სამუშაო ჯგუფის ფარგლებში განხილვა შედგა დღის წესრიგით გათვალისწინებულ ყველა საკითხზე, მათ შორის, საქართველოს ოკუპირებულ ტერიტორიებზე - აფხაზეთსა და ცხინვალის რეგიონში - უსაფრთხოებისა და სტაბილურობის საკითხებზე. ასევე, მილიტარიზაციის, უკანონო სამხედრო წვრთნებისა და აფხაზეთისა და ცხინვალის რეგიონის ფაქტობრივი ანექსიის პროცესებზე. ქართულმა მხარემ რუსეთის ფედერაციას მოუწოდა 2008 წლის 12 აგვისტოს ცეცხლის შეწყვეტის შეთანხმების შესრულებისაკენ.

საგარეოს განცხადებით, ქართულმა მხარემ მოითხოვა საქართველოს მიერ ცალმხრივად არაერთხელ აღებული ვალდებულების საპასუხოდ, რუსეთის ფედერაციის მიერ ძალის არგამოყენების მკაფიო დადასტურება, რაც გარანტირებული უნდა იქნას ოკუპირებულ რეგიონებში უსაფრთხოების საერთაშორისო მექანიზმებით.

ამას გარდა, მონაწილეებმა საქართველოდან ორივე სამუშაო ჯგუფში მწვავედ დააყენეს 19 მაისს სოფელ ხურჩაში მომხდარი მკვლელობის საკითხი. ქართულმა მხარემ მონაწილეებს დამატებითი ინფორმაცია მიაწოდა მკვლელობის ფაქტზე და კატეგორიულად მოითხოვა დამნაშავის დაუყოვნებლივ დაკავება, რასაც მხარი დაუჭირეს თანათავმჯდომარეებმა და დანარჩენმა მონაწილეებმა.

საგარეო უწყება განცხადებაში აღნიშნავს, რომ საოკუპაციო რეჟიმის წარმომადგენლებს არ გააჩნდათ ღირებული ინფორმაცია აღნიშნულ საქმესთან დაკავშირებით. მონაწილეებმა იმედი გამოთქვეს, რომ 6 ივლისს გალში ინციდენტების პრევენციისა და მათზე რეაგირების მექანიზმის მორიგი შეხვედრა მეტ სიცხადეს შეიტანს ხურჩაში მომხდარი მკვლელობის საქმეში.

შეხვედრისას ორივე სამუშაო ჯგუფში განიხილეს საოკუპაციო ხაზზე მავთულხლართების, ე.წ. საზღვრის აღმნიშვნელი ნიშნებისა და სხვა ხელოვნური ბარიერების აღმართვის გაგრძელება. მონაწილეებმა საქართველოდან მოითხოვეს საოკუპაციო ხაზზე თავისუფალი და უსაფრთხო გადაადგილების უზრუნველყოფის გარანტიების შექმნა.

საგარეო უწყების განცხადებით, მოლაპარაკებებს ევროკავშირის, გაერო-სა და ეუთო-ს წარმომადგენლები ესწრებოდნენ. ასევე მონაწილეები საქართველოდან, რუსეთის ფედერაციიდან და ამერიკის შეერთებული შტატებიდან. მოლაპარაკებებში მონაწილეობდნენ ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.

14–15 ივნისს ჟენევაში გამართულ მოლაპარაკებებს გამოეხმაურა რუსეთის საგარეო საქმეთა სამინისტრო. უწყების განცხადებით, მოლაპარაკებების პროცესზე უარყოფითი გავლენა მოახდინა გაეროს გენერალურ ასამბლეაზე მიმდინარე წლის 7 ივნისს საქართველოს მიერ ლტოლვილთა და იძულებით გადაადგილებული პირების შესახებ წარდგენილმა რეზოლუციის პროექტმა. რუსეთის განცხადებით, სამხრეთ ოსეთისა და აფხაზეთის დე–ფაქტო ხელისუფლებები მიიჩნევენ, რომ ეს რეზოლუცია პოლიტიკურად მოტივირებულია და არ პასუხობს არსებულ რეალობას. რუსეთი და ოკუპირებული რეგიონები ასევე უარყოფითად აფასებენ მაისში, საქართველოში ნატოს ეგიდით ჩატარებულ სამხედრო სწავლებას Noble Partner 2016–ს. რუსეთის საგარეო საქმეთა სამინისტრო აცხადებს, რომ ოკუპირებულ ტერიტორიების მიმდებარე დასახლებებში ცალკეული ინციდენტების მიუხედავად, სიტუაცია სტაბილურია.