ამერიკის შეერთებული შტატების ჰელსინკის კომისია განცხადებას ავრცელებს, სადაც შეშფოთებას გამოხატავს ქართული ოცნების გადაწყვეტილებით, ანაკლიის ღრმაწყლოვანი პორტი ჩინურ კომპანიას გადასცეს სამართავად.

ჰელსინკის კომისიის განცხადებაში ვკითხულობთ, რომ ანაკლიის გარიგებაში ჩართული დეველოპერები, მათ შორის აშშ-ისგან სანქცირებული China Communications Construction Company, ცნობილია იმით, რომ ინფრასტრუქტურულ პროექტებს მასპინძელი ქვეყნების ექსპლუატაციისა და დესტაბილიზაციისთვის იყენებს.

"ჩვენ შეშფოთებულები ვართ ქართული ოცნების გადაწყვეტილებით, რომლის მიხედვითაც ანაკლიის ღრმაწყლოვანი პორტის კონტროლი გადასცეს ჩინეთის საბჭოთა რესპუბლიკის მიერ მხარდაჭერილ, აშშ-ს სანქცირებულ კონგლომერატს. ამ გარიგებაში ჩართულ დეველოპერებს, მათ შორის China Communications Construction Company-ს აქვს ინფრასტრუქტურული განვითარების პროექტების გამოყენების ისტორია.

რუსეთი რეგიონს ნაკლებად უსაფრთხოს ხდის და ზღუდავს თავისუფალ ვაჭრობას ამ შეთანხმებით, ქართული ოცნება კიდევ უფრო საფრთხეს უქმნის თავისი ქვეყნის დემოკრატიულ ტრაექტორიას და უნარს, განსაზღვროს საკუთარი ეკონომიკური მომავალი," — ვკითხულობთ განცხადებაში.

განცხადებაში ასევე ვკითხულობთ, რომ ჰელსინკის კომისიის შეფასებით, კრიტიკულ ინფრასტრუქტურულ პროექტებში ინვესტიციები უნდა ხმარდებოდეს საქართველოს ეკონომიკური უსაფრთხოების გაძლიერებასა და არა ქვეყანაზე ზედმეტ საგარეო გავლენას.

კომისიამ ასევე დასძინა, რომ ანაკლიის პორტი ჩინეთის კონტროლის განვითარების შემთხვევაში, საქართველო სტრატეგიულ აქტივს დაუთმობს ოცნების ხელისუფლებას, რომელიც არ იზიარებს მის დემოკრატიულ ღირებულებებს ან მიზანს, შეუერთდეს ტრანსატლანტიკურ უსაფრთხოების არქიტექტურას, რაც საქართველოს გრძელვადიან უსაფრთხოებას საფრთხეს უქმნის.

შეგახსენებთ, 2020 წლის დასაწყისში ქართულმა ოცნებამ განაცხადა, რომ ის "ანაკლიის განვითარების კონსორციუმთან" წყვეტდა ღრმაწყლოვანი პორტის მშენებლობის საინვესტიციო ხელშეკრულებას. მიზეზად დასახელდა ის, რომ კონსორციუმმა ვერ შეასრულა ხელშეკრულებით გათვალისწინებული ვალდებულებები. თუმცა, კონსორციუმის ხელმძღვანელობა აცხადებდა, რომ სტრატეგიული პორტის მშენებლობა მიზანმიმართულად ჩაიშალა გეოპოლიტიკური მიზეზებით.

სწორედ ხელშეკრულების ჩაშლის შემდეგ, "ანაკლიის განვითარების კონსორციუმმა" საქართველოს მთავრობის წინააღმდეგ საარბიტრაჟო სასამართლოს მიმართა.

BM.ge-ს ინფორმაციით,2024 წლის მაისში მთავრობამ ჩინური სახელმწიფო კორპორაცია CCCC-ი ანაკლიის ინვესტორის შესარჩევ კონკურსში უპირატეს მონაწილედ გამოაცხადა. მაშინ ეკონომიკის მინისტრმა ლევან დავითაშვილმა თქვა, რომ CCCC ოფიციალურად გამარჯვებულად, სავარაუდოდ, რამდენიმე დღის ვადაში დასახელდებოდა, თუმცა ამ განცხადებიდან რამდენიმე თვის შემდეგაც CCCC გამარჯვებულად გამოვლენილი არაა და ის და საქართველოს მთავრობა კვლავ მოლაპარაკებებს მართავენ. პორტის კერძო ინვესტორის შერჩევის კონკურსი შარშან მაისში დასრულდა. კონკურსის ფინალურ ეტაპზე ორი კომპანია იყო გადასული, ესენია ჩინური CCCC და შვეიცარიული (TIL) Terminal Investment Limited Holding S.A, რომელიც მსოფლიოს ერთ-ერთი უმსხვილესი საზღვაო ჯგუფის MSC-ის შემადგენელი კომპანიაა. აღნიშნულ ტენდერში TIL-მა საბოლოო წინადადება არ წარადგინა, შესაბამისად ერთადერთი, რომელმაც სახელმწიფოს პროექტში ინვესტირება შესთავაზა, ჩინური სახელმწიფო კორპორაცია CCCC იყო. პროექტის მიხედვით, CCCC ანაკლიის ღრმაწყლოვანი პორტის ერთობლივი კომპანიის 49%-იანი წილის მფლობელი იქნება, ხოლო საქართველოს მთავრობა პროექტის მაჟორიტარი 51%-იანი აქციონერი იქნება.