ევროსაბჭოს ადამიანის უფლებათა კომისარი, მაიკლ ო'ფლაერტი ქართულ ოცნებას მოუწოდებს დემონსტრანტების წინააღმდეგ არასათანადო მოპყრობის შემთხვევების ეფექტური გამოძიების უზრუნველსაყოფად ყველა საჭირო ზომა მიიღოს.

მემორანდუმში ასევე ვკითხულობთ, რომ ევროსაბჭო "უცხოური გავლენის გამჭვირვალობისა" და "ოჯახური ღირებულებებისა და არასრულწლოვანთა დაცვის" შესახებ კანონების გაუქმების რეკომენდაციას გასცემს. კომისარი ასევე შეშფოთებულია მზია ამაღლობელის საქმეზე და მისი შეფასებით ჟურნალისტის წინასწარი დაკავება გაუმართლებელია.

დემონსტრანტების წინააღმდეგ არასათანადო მოპყრობის გამოძიება და საიდენტიფიკაციო ნიშნების ტარების რეკომენდაცია

როგორც მაიკლ ო'ფლაერტის მიერ საქართველოში ადამიანის უფლებების მდგომარეობის შესახებ გამოქვეყნებულ მემორანდუმში აღნიშნულია, რომ დემონსტრანტებისა და ჟურნალისტების წინააღმდეგ არასათანადო მოპყრობის სარწმუნო ცნობების მიუხედავად, ძალადობისთვის არც ერთი სამართალდამცავი პირის პასუხისმგებლობის საკითხი არ დამდგარა. მეტიც, პროტესტის ზოგიერთი მონაწილის წინააღმდეგ სისხლისსამართლებრივი დევნა მიმდინარეობს.

კომისრის რეკომენდაციაში ვკითხულობთ:

  • ყველა სამართალდამცავი პერსონალი უნდა ატარებდეს თვალსაჩინო და ინდივიდუალურად გამორჩეული მაიდენტიფიცირებელ ნიშანს.
  • გარანტია, რომ ყველა ჟურნალისტს თავისუფლად და უსაფრთხოდ შეეძლება აქციებისა და სხვა საჯარო შეკრებების გაშუქება.

მაიკლ ო'ფლაერტი რეკომენდაციის სახით საქართველოს ხელისუფლებას დემონსტრანტების წინააღმდეგ არასათანადო მოპყრობის შემთხვევების ეფექტური გამოძიების უზრუნველსაყოფად, ყველა საჭირო ზომის მიღებისკენ მოუწოდებს, მათ შორის სპეციალური საგამოძიებო სამსახურის დამოუკიდებლობისა და ეფექტურობის გაძლიერების გზით.

ცნობისთვის, 18 თებერვალს, ტვ პირველის ოპერატორის, ლაშა ჯიოშვილის დაკავების ფაქტზე, ჟურნალისტებმა ოცნების დეპუტატებს მიმართეს კითხვით: როგორ გავარჩიოთ გამტაცებელი პოლიციელისგან?

ქართული ოცნების დეპუტატმა, ვლადიმერ ბოჟაძემ ჟურნალისტებს განუცხადა, რომ საქართველოში ადამიანებს არ იტაცებენ და პოლიციას უნდა ვენდოთ. ქართული ოცნების პარლამენტის ვიცე-სპიკერის, გია ვოლსკის თქმით, პოლიციელის და გამტაცებლის გარჩევა იმის მიხედვით მოხდება თუ სად აღმოჩნდება გატაცებული — სასაფლაოზე თუ საგამოძიებო ოთახში.

კომისარი შეშფოთებას გამოხატავს შეკრების თავისუფლების შესახებ კანონში შეტანილი ცვლილებების შესახებ, რომელიც "დემონსტრანტების წინააღმდეგ ზედმეტ შეზღუდვებს აწესებს, აფართოებს სამართალდამცავი ორგანოების უფლებამოსილებებს და პროტესტთან დაკავშირებული ადმინისტრაციული სამართალდარღვევებისთვის უფრო მკაცრ ჯარიმებს აწესებს".

"კომისარი აღნიშნავს, რომ ბევრი ცვლილება კანონიერების, აუცილებლობისა და პროპორციულობის პრინციპებთან შეუთავსებელია და რეკომენდაციას უწევს ადამიანის უფლებათა საერთაშორისო სტანდარტებთან შესაბამისობაში მოყვანის მიზნით კანონებში ცვლილებების შეტანას," — ნათქვამია მემორანდუმში.

მემორანდუმში ასევე საუბარია მზია ამაღლობელის საქმეზეც. კომისრის შეფასებით ჟურნალისტის დაკავება გაუმართლებელია და დამოუკიდებელი ჟურნალისტიკისთვის რთულ პერიოდს ასახავს.

"ჟურნალისტ მზია ამაღლობელის საქმე, რომელსაც კომისარი ციხეში ესტუმრა, დამოუკიდებელი ჟურნალისტიკისთვის მზარდ რთულ პირობებს ასახავს. კომისარმა უკვე განაცხადა, რომ მისი წინასწარი დაკავება გაუმართლებელია", — აღნიშნულია მემორანდუმში.

"უცხოური გავლენის გამჭვირვალობისა" და "ოჯახური ღირებულებებისა და არასრულწლოვანთა დაცვის" კანონების გაუქმების რეკომენდაცია

ევროსაბჭოს მემორანდუმში ასევე საუბარია ქართული ოცნების მიერ დაინფიცირებულ კანონებზე. კომისარი "უცხოური გავლენის გამჭვირვალობისა" და "ოჯახური ღირებულებებისა და არასრულწლოვანთა დაცვის" შესახებ კანონების გაუქმების რეკომენდაციას გასცემს.

მემორანდუმში ვკითხულობთ, რომ "უცხოური გავლენის გამჭვირვალეობის" კანონი მიმართულია არასამთავრობო ორგანიზაციებისა და უფლებადამცველების წინააღმდეგ და მისი ერთადერთი დანიშნულება "გადაწყვეტილების მიღების პროცესში სამოქალაქო საზოგადოების ორგანიზაციების არასაკმარისი მონაწილეობაა" და ამ გადაწყვეტილების მიღებაში სამოქალაქო საზოგადოების ორგანიზაციების არასაკმარისი მონაწილეობა მიიღეს.

კომისარი სამოქალაქო საზოგადოებისა და უფლებადამცველებისთვის ხელსაყრელი გარემოს შექმნის მიზნით რიგ რეკომენდაციებს ასახელებს. მათ შორის, "უცხოური გავლენის გამჭვირვალობის შესახებ" კანონის გაუქმებასა და იმის უზრუნველყოფას, რომ შეკრების შესახებ ნებისმიერი კანონმდებლობა ადამიანის უფლებათა საერთაშორისო კანონმდებლობას სრულად შეესაბამებოდეს.

გარდა ამისა, კომისარი შეშფოთებულია LGBTI პირების წინაშე არსებული ძალადობისა და დისკრიმინაციის დონითაც.

"ხელისუფლებამ LGBTI პირების ყოველგვარი სტიგმატიზაცია უნდა შეწყვიტოს და შევიწროებისა და ძალადობის ყველა შემთხვევის ეფექტურად გამოძიება უნდა უზრუნველყოს", — აცხადებს მაიკლ ო'ფლაერტი.

კომისარი აღნიშნავს, რომ ხელისუფლებამ "ოჯახური ღირებულებებისა და არასრულწლოვანთა დაცვის" შესახებ კანონი უნდა გააუქმოს, რომელიც LGBTI პირების დისკრიმინაციის სამართლებრივ საფუძველს ქმნის და LGBTI პირების უფლებებთან დაკავშირებით ადამიანის უფლებათა ევროპული სასამართლოს გადაწყვეტილებები განახორციელოს.