ლედი გაგამ ფსიქოზი დაამარცხა — აი, რას ამბობს მომღერალი

ლედი გაგას ახალი ალბომი, Mayhem, მსმენელის დიდხნიანი ლოდინის შემდეგ გამოვიდა. ალბომზე და სამომავლო გეგმებზე სასაუბროდ პოპის ლეგენდა აქტიურად ხვდება პრესას. მედიასთან ერთ-ერთი შეხვედრისას, პოდკასტში The Interview, გაგამ თავის მენტალურ ჯანმრთელობაზეც ისაუბრა.

მომღერლის თქმით, 5 წლის წინ ფსიქოზის დიაგნოზი დაუსვეს. მენტალური ჯანმრთელობის ამერიკის ეროვნული ინსტიტუტი ფსიქოზს განმარტავს, როგორც "სიმპტომების ერთობას, რომელიც გონებაზე გავლენას ახდენს" და ადამიანს რეალობის წარმოსახვისგან გარჩევაში უშლის ხელს.

"გარკვეული დროის განმავლობაში რეალობას მოწყვეტილი ვიყავი. ამან ცხოვრებასთან დამაშორა და რამდენიმეწლიანი თავაუღებელი შრომის შემდეგ, ჩემი თავი დავიბრუნე," — თქვა გაგამ. მისი თქმით, კარიერის დასაწყისში პერსონაჟების განსახიერებამ მის რეალობისგან დაშორებას ხელი შეუწყო.

"უნდა გამეგო, როგორ დავკავშირებოდი ჩემს სასცენო პერსონას და ყოველდღიურ ცხოვრებაში გადმომეტანა ლედი გაგას "ბოსური" ენერგია, ამასთან ერთად კი გონებაში დამელაგებინა ეს ორი ურთიერთსაწინააღმდეგო ფენომენი. ვფიქრობ, რომ კეთილი ადამიანი ვარ, თუმცა სცენაზე მრისხანე, მტკიცე და ინტენსიურიც ვარ, ამიტომ უნდა მესწავლა, რომ ჩემი პიროვნების ორი მხარე გამეერთიანებინა და ჩემს თავთან ომი შემეწყვიტა. ვისწავლე, რომ ჩემი სულისთვის ნავთი არ დამესხა. ადრე ქაოსში ცხოვრება მომწონდა, ახლა კი ვამაყობ, რომ უფრო მოსაწყენი გავხდი," — ამბობს გაგა.

როგორც ჩანს, მომღერლისთვის საკუთარ მენტალურ ჯანმრთელობაზე საუბარი ახლაც არაა მარტივი, მაგრამ ამ თემაზე ცნობადობის ამაღლების საჭიროებას ის აშკარად გრძნობს — "დროის სვლასთან ერთად, სულ უფრო მირთულდება ამ თემაზე საუბარი. ვერ ვიტან იმ გრძნობას, რომ ეს ჩემი განმსაზღვრელია. ადრე ამის მრცხვენოდა, მაგრამ ვფიქრობ, რომ არ უნდა გვრცხვენოდეს იმის, რომ რთული დრო გამოვიარეთ. ყველაზე მეტად იმის თქმა მინდა, რომ ბოლოს ყველაფერი უმჯობესდება. ჩემს შემთხვევაში ასე მოხდა და ამის გამო ძალიან მადლიერი ვარ."

იხილეთ ასევე:

ბოლო ამბები:

გირჩევთ