ზოი სალდანა კინოაკადემიის 97-ე დაჯილდოების ოსკაროსანი გახდა მეორეხარისხოვანი როლის შემსრულებელი მსახიობი ქალის ნომინაციაში. მსახიობმა, რომელიც მაყურებელმა Guardians of The Galaxy-ში და Avatar-ში შესრულებული როლებით გაიცნო, ოსკაროსანი ჟაკ ოდრიარის ფილმში, Emilia Pérez-ში შესრულებული როლით კინოინდუსტრიის ყველაზე პრესტიჟული ჯილდო დაიმსახურა და ემოციური სიტყვით გამოვიდა.

სალდანამ Emilia Pérez-ის ქასთს მადლობა გადაუხადა: "მადლობა კინოაკადემიას, რიტას მსგავს ქალში ჩუმი გმირობისა და ძალის დანახვისათვის და ძლიერ ქალებზე საუბრისათვის. ჟაკ, ჩემი ცხოვრების საყვარელი პერსონაჟი ხარ. მადლობა ჩემით დაინტერესებისათვის. Emilia Pérez-ის ქასთსა და სტაფს მინდა ვუთხრა, რომ ამ ჯილდოს მათ ვუზიარებ."

ზოი სალდანა ფილმში Emilia Perez

ფოტო: Shanna Besson/Page 114/Why Not Productions/Pathé Films/France 2 Cinéma

მსახიობმა თავის ოჯახსა და ბებიაზეც ისაუბრა, რა დროსაც ცრემლები ვერ შეიკავა — "ბებიაჩემი ამ ქვეყანაში 1961 წელს ჩამოვიდა. მე ემიგრანტი მშობლების ამაყი შვილი ვარ, რომლებიც ოცნებებით, ღირსებითა და მშრომელი ხელებით ცხოვრობენ. მე პირველი დომინიკური წარმოშობის ამერიკელი ვარ, რომელმაც ოსკარი მოიპოვა და ვიცი, რომ უკანასკნელი არ ვიქნები. ბებიაჩემს რომ ენახა, რომ იმ ფილმში, რომლისთვისაც ჯილდო მოვიპოვე, ესპანურად ვმღერი და ვსაუბრობ, აღფრთოვანებული იქნებოდა. ეს ოსკარი ბებიაჩემს ეძღვნება."

Emilia Pérez 13 საოსკარე ნომინაციაზე იყო წარდგენილი — წლევანდელ ცერემონიაზე სწორედ ოდრიარის ფილმმა მოიპოვა ყველაზე მეტი ნომინაცია, თუმცა გამარჯვება მხოლოდ ორ კატეგორიაში შეძლო. ზოი სალდანას წარმატების გარდა, ფილმმა ასევე გაიმარჯვა საუკეთესო სიმღერის ნომინაციაში.

იხილეთ ასევე: