"ბევრი რამ იქნება დამოკიდებული "დიფ სთეითის" დამარცხებაზე. იმდენად, რამდენადაც შეძლებს ტრამპი "დიფ სთეითის" დამარცხებას, გადაიტვირთება ურთიერთობები საქართველოსა და აშშ-ს შორის," — განუცხადა ოცნების პრემიერმინისტრმა ირაკლი კობახიძემ ჟურნალისტებს საქართველოსა და აშშ-ს ურთიერთობებზე საუბრისას.

კობახიძის თქმით, ქართულ ოცნებას სურვილი აქვს აშშ-სთან სტრატეგიული ურთიერთობები "სუფთა ფურცლიდან" განაახლონ. ოცნების პრემიერმინისტრმა ასევე დასძინა, რომ მას ესმის რამდენად დაკავებულია აშშ-ს პრეზიდენტის, დონალდ ტრამპის ადმინისტრაცია და საკმარისი დრო ვერ გამონახეს რომ საქართველოთი დაინტერესებულიყვნენ.

"ჩვენ გვაქვს აშშ-სთან ურთიერთობების გადატვირთვის სურვილი და ამის შესახებ არაერთი განცხადება გავაკეთეთ. ჩვენ გვინდა არა მხოლოდ ურთიერთობების გადატვირთვა, არამედ უფრო მეტიც, გვინდა კონკრეტული გზამკვლევით, სუფთა ფურცლიდან განვაახლოთ სტრატეგიული პარტნიორობა. ეს არის ჩვენი ღია შეთავაზება ამერიკის შეერთებული შტატების ხელისუფლების მიმართ. გვესმის, რომ დღეს ძალიან ბევრი საქმე აქვს ტრამპის ადმინისტრაციას, არის შიდა საქმეები მოსაგვარებელი, არის ომის დამთავრების საკითხი, რითაც არის დაკავებული ტრამპის ადმინისტრაცია. აქედან გამომდინარე, შეიძლება საკმარისი დრო ვერ გამოინახოს ამ ეტაპზე საქართველოსთვის, თუმცა ვფიქრობ, გარკვეულ ეტაპზე დადგება აუცილებლად ის დრო, როცა ტრამპის ადმინისტრაცია სერიოზულად დაინტერესდება ქართულ-ამერიკული ურთიერთობებით და ეს უნდა გახდეს საწინდარი იმისა, რომ გადაიტვირთოს ურთიერთობები საქართველოსა და აშშ-ს შორის. ასევე ბევრი რამ იქნება დამოკიდებული "დიფ სთეითის" დამარცხებაზე. იმდენად, რამდენადაც შეძლებს ტრამპი "დიფ სთეითის" დამარცხებას, გადაიტვირთება ურთიერთობები საქართველოსა და აშშ-ს შორის," — განაცხადა კობახიძემ.

აშშ-ს გარდა, ირაკლი კობახიძემ ისაუბრა ევროკავშირზეც და განაცხადა, რომ უმჯობესია ევროკავშირის უმაღლესი თანამდებობის პირები საკუთარი პრობლემების მოგვარებაზე იყვნენ კონცენტრირებული.

"იცით, რომ კრიზისული ვითარებაა, დღეს ევროკავშირში არის მძიმე ტენდენციები ეკონომიკური რეცესიის თვალსაზრისით, ალბათ, უფრო მეტად ამაზე უნდა იყვნენ კონცენტრირებული ევროკავშირის უმაღლესი წარმომადგენლები. უმჯობესია, ევროკავშირის უმაღლესი თანამდებობის პირები იყვნენ კონცენტრირებული საკუთარი პრობლემების მოგვარებაზე," — განაცხადა ირაკლი კობახიძემ.