საქართველოში გაერთიანებული სამეფოს საელჩო Facebook პოსტს აქვეყნებს, რომელშიც ოკუპირებულ აფხაზეთში ჩატარებულ ე.წ. "საპრეზიდენტო არჩევნებს" ეხმიანება. საელჩოს განცხადებით, დიდი ბრიტანეთი არ აღიარებს ამ "არჩევნების" ლეგიტიმურობას და რჩება საქართველოს ტერიტორიული მთლიანობის ერთგულ მხარდამჭერად.

"დიდი ბრიტანეთი არ აღიარებს საქართველოს აფხაზეთის რეგიონში, 2025 წლის 15 თებერვალს ჩატარებული ე.წ. საპრეზიდენტო არჩევნების ლეგიტიმურობას.

კიდევ ერთხელ ვადასტურებთ სრულ მხარდაჭერას საქართველოს ტერიტორიული მთლიანობისა და სუვერენიტეტის მიმართ, მის საერთაშორისოდ აღიარებულ საზღვრებში", — ვკითხულობთ განცხადებაში.

ინფორმაციისთვის, ოკუპირებულ აფხაზეთში ე.წ. "საპრეზიდენტო არჩევნების" პირველი ტური 15 თებერვალს ჩატარდა. "პრეზიდენტობისთვის" მეორე ტურში ერთმანეთს ბადრა გუნბა და ადგურ არძინბა დაუპირისპირდებიან.