ჯგუფ "დაიტოვეს" ერთ-ერთი დამფუძნებელი, ნენსი ვოლანდი, Facebook-ზე პოსტს აქვეყნებს, რომელშიც საუბრობს დღეზე, როცა მისი სახლი პოლიციამ გაჩხრიკა. სამოქალაქო აქტივისტი იხსენებს, რომ პირადი ჩხრეკისას ქალმა პოლიციელებმა მას ტანსაცმლის სრულად გახდა მოსთხოვეს.

"პირველ რიგში, ჩემს სახლში შემოვიდა ორი ქალი პოლიციელი, ვინც პირადი ჩხრეკა ჩაატარა და ეს იყო პირველი ფსიქოლოგიური ძალადობა ჩემზე როცა მითხრეს რომ ტანსაცმელი სრულიად უნდა გავიხადო. კი ექიმთან ვარ ნამყოფი, მაგრამ სისტემის უსამართლობა როცა გაშიშვლებს, ბევრად უხერხულია და უსამართლობისგან ყველაფერი გეწვის", — წერს ნენსი ვოლანდი.

გარდა ამისა აქტივისტი საუბრობს ნივთებზეც, რომლებიც პოლიციამ მისი სახლიდან წაიღო — მათ შორისაა ბაბუამისის ნაქონი ძველებური ფოტოაპარატიც, რომელსაც აქტივისტისთვის მნიშვნელოვანი ემოციური დატვირთვა აქვს. წაღებულია სახლის კამერაც, რომელიც შეიცავს ვოლანდის პირად კადრებსაც.

"სახლში მქონდა ბაბუაჩემის ნაქონი ორი 60იანი წლების ძველებური კამერა, რომელშიც ფირიც კი არ იყო. როცა მკითხეს რა არის, ვუთხარი და ალბათ ჩემს თვალებში ან ხმაში განსაკუთრებული სიყვარული დაინახეს და ეგრევე სტაცეს ხელი, რომ უფრო გავეტეხე ფსიქოლოგიურად.

წაიღეს სახლის კამერა, რომლითაც პაწიკოებს ვუყურებდი, როცა სამსახურში ან აქციაზე ვიყავი, შესაბამისად ეს კამერა ჩემს პირად კადრებს შეიცავს", — წერს ნენსი ვოლანდი.

"დაიტოვეს" დამფუძნებელი საუბრობს იმაზე, რომ მეორედ ჩატარებული ჩხრეკა, გარდა ჩამოთვლილი ფაქტებისა, მნიშვნელოვნად მოქმედებს ფსიქოლოგიური ზეწოლის კუთხითაც, რადგან სამუშაოდ აუცილებელი ტექნიკის წართმევა ფინანსური პრობლემების წინაშე აყენებს.

"მეორე წრეზე წამართვეს ტექნიკა, რომელიც სასიცოცხლოდ მნიშვნელოვანია ჩემი ფინანსური მდგომარეობისთვის და ზუსტად იციან ეს. ამჯერად ჩემი კომპიუტერიც, რომელშიც ყველა ჩემი ნახატი ინახება და ის პროექტი რომელზეც ვმუშაობდი", — წერს აქტივისტი.

ნენსი ვოლანდის პოსტს გამოეხმაურა ყოფილი სახალხო დამცველი ნინო ლომჯარიაც, რომელმაც აღნიშნა, რომ გაშიშვლების პრაქტიკას პოსტზე ყოფნისას აკრიტიკებდა და ანგარიშებშიც აღნიშნავდა, თუმცა სახელმწიფოს ამაზე რეაგირება არ ჰქონია.

"სახალხო დამცველის ანგარიშებში ამაზე ვწერდით მეც და ჩემი წინამორბედიც, რადგან პრევენციის ეროვნულმა მექანიზმმა ეს უკანონობა გამოავლინა. და რა გააკეთა სისტემამ? ქალთა კოლონიაში ქალი პატიმრები ააჯანყა სახალხო დამცველის წინააღმდეგ, თითქოსდა სიცრუეს ვავრცელებდით", — წერს ნინო ლომჯარია.