2 თებერვალს, "თბილისი მოლთან" გამართულ აქციაზე სასტიკად ნაცემმა ზურაბ შონიამ, TV პირველთან გააკეთა კომენტარი, სადაც ჩანს როგორ აქვს თვალ-ბუდის არეში მძიმე დაზიანება მიყენებული.

"დამიჭირეს, მცემეს, მომხდარის შესახებ დეტალურად მას შემდეგ მოვყვები, რაც იურისტებს შევხვდები. სანამ ავტომობილამდე მიმიყვანდნენ, მანამდე [გამისწორდნენ]. არ ვიცი, თავჩახრილს მირტყეს და მერე ჩამსვეს მანქანაში. მანქანაში პატრული ნორმალურად მექცეოდა,“ – ამბობს ზურაბ შონია.

მოგვიანებით, ზურაბ შონიამ სოციალურ ქსელში მადლობა გადაუხადა ყველას მხარდაჭერისთვის და გვაცნობა, რომ მისი ჯანმრთელობის მდგომარეობა სტაბილურია და გამოწერეს საავადმყოფოდან.

"მეგობრებო, დიდი მადლობა მხარდაჭერისთვის, მოკითხვისთვის და გამხნევებისთვის. გამომწერეს, კარგად ვარ. იმედია ძალიან მალე ვიცხოვრებთ სამართლიან, თავისუფალ ქვეყანაში, სადაც ადამიანის ფუნდამენტური უფლებები დაცული იქნება" — განაცხადა მან.

2 თებერვალს, უწყვეტი პროტესტის 67-ე დღეს, "თბილისი მოლთან" გამართულ აქციაზე ადმინისტრაციული წესით 31 პირი დააკავეს. ტვ პირველმა გაავრცელა კადრები, თუ როგორ უსწორდებოდნენ გდდ-ს თანამშრომლები და მათი ხელმძღვანელი, ზვიად ხარაზიშვილი (ხარება) აქციაზე დაკავებულებს.

სახალხო დამცველმა აქციაზე დაზარალებულების მონახულების შემდეგ განაცხადა, რომ 25 პირიდან, 11-ს ჰქონდა სხეულის დაზიანებები. აქედან ერთ-ერთს თვალ-ბუდის არეში მძიმე დაზიანება ჰქონდა მიყენებული.