"როდის ხდება ჟურნალისტი აქტივისტი? ამ კითხვას რატომ არ უსვამს ირაკლი კობახიძე საკუთარ თავს? მაშინ ხომ არ ხდება, როცა დიქტატურაა?", — ამის შესახებ საზოგადოებრივ მაუწყებელთან მყოფმა მედიაექსპერტმა, ზვიად ქორიძემ განაცხადა, სადაც ბათუმში დაკავებული ბათუმელებისა და ნეტგაზეთის დამფუძნებლისა და დირექტორის, მზია ამაღლობელის მხარდამჭერი აქცია იმართება.

ზვიად ქორიძემ ოცნების პარლამენტის თავმჯდომარესთან მისამართით ნათქვამი ბათუმელების რედაქტორის სიტყვები გაიხსენა.

"ეთერ თურაძემ გასაგებად აუხსნა შალვა პაპუაშვილს, რომ ვერავინ, ვერც ერთმა მმართველმა, ვერც აბაშიძემ, ვერც შევარდნაძემ, ვერც სააკაშვილმა ვერ შეძლეს, რომ ის გასულიყო ჟურნალისტური საქმიანობის მანდატიდან და მხოლოდ ქართული ოცნების ხელისუფლებამ აქცია ის აქტივისტად.

როდის ხდება ჟურნალისტი აქტივისტი? ამ კითხვას რატომ არ უსვამს ირაკლი კობახიძე საკუთარ თავს? მაშინ ხომ არ ხდება, როცა დიქტატურაა? მაშინ ხომ არა, როცა ავტორიტარიზმი შედის ყველას სახლში, ყველას სულში? სწორედ მაშინ ხდება ჟურნალისტი აქტივისტი. რომ დაიკავა ხელში მარია რესას წიგნი, "როგორ დავამარცხოთ დიქტატურა" — ამ წიგნზე მეტყველი ფოტოზე მზია ამაღლობელის თვალებია. ეს გამოხედვა დაამარცხებს ბიძინა ივანიშვილის დიქტატურას, მე ამაში დარწმუნებული ვარ," — განაცხადა ზვიად ქორიძემ.

შეგახსენებთ, რომ მზია ამაღლობელი 11-12 იანვრის ღამეს 2-ჯერ დააკავეს, ერთხელ სტიკერის მიკვრისთვის, მეორედ - გათავისუფლებიდან რამდენიმე წუთში. მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს. 14 იანვარს, მზია ამაღლობელს ბათუმის საქალაქო სასამართლოს მოსამართლემ, ნინო სახელაშვილმა პატიმრობა შეუფარდა.

15 იანვარს კი, ბათუმში, მზია ამაღლობელის მხარდამჭერ აქციაზე ჩასულ ზვიად ქორიძეს, სასტუმრო შერატონის ფოიეში, ქართული ოცნების დეპუტატი დიმიტრი სამხარაძე და აჭარის ფინანსთა და ეკონომიკის მინისტრის მოადგილე გიორგი მანველიძე თავს დაესხნენ. იმავე ღამეს, შერატონის ფოიეშივე, "ქართული ოცნების" დეპუტატი დიმიტრი სამხარაძე ფიზიკურად გაუსწორდა პარტია გახარია საქართველოსთვის ლიდერს, გიორგი გახარიას.