"ვთვლი, რომ ივანიშვილი არის დასამხობი" — პროკურატურამ სასამართლოზე ნათქვამი ამ ფრაზისთვის ყოფილ თავდაცვის და შინაგან საქმეთა მინისტრს, ბაჩო ახალაიას ახალი ბრალი წარუდგინა.

ახალაიას ბრალი სისხლის სამართლის კოდექსის 317-ე მუხლით წარედგინა, რაც გულისხმობს საქართველოს კონსტიტუციური წყობილების ძალადობით შეცვლისაკენ და სახელმწიფო ხელისუფლების დამხობისაკენ მოწოდებას.

"გამოძიებით დადგენილია, მიმდინარე წლის 16 თებერვალს, თბილისის საქალაქო სასამართლოში გამართულ ღია სასამართლო სხდომაზე, ბაჩანა ახალაიამ სიტყვით სარგებლობისას საჯაროდ მოუწოდა საქართველოს კონსტიტუციური წყობილების ძალადობით შეცვლის და სახელმწიფო ხელისუფლების დამხობის შესახებ.

ბაჩანა ახალიას ბრალდება საქართველოს სისხლის სამართლის კოდექსის 317-ე მუხლით წარედგინა (მოწოდება საქართველოს კონსტიტუციური წყობილების ძალადობით შეცვლისაკენ და სახელმწიფო ხელისუფლების დამხობისაკენ), რაც სასჯელის სახედ და ზომად 3 წლამდე თავისუფლების აღკვეთას ითვალისწინებს," — ვკითხულობთ პროკურატურის განცახდებაში.

სასამართლო პროცესზე ბაჩო ახალაიას სიტყვით გამოსვლას მისი ცოლი, ანა ნადარეიშვილი ავრცელებს.

"მე ვთვლი, რომ ივანიშვილი არის დასამხობი, დასამხობია ყველა შესაძლო გზით. თუ დასჭირდება ძალა, დასამხობია ძალით, ივანიშვილთან ერთად დასამხობია რუსული საცეცები, რაც შეიძლება ფართო მასშტაბით საქართველოში.

ეს არის ერთადერთი გამოსავალი, ეს არის ერთადერთი გზა იმისთვის, რომ დავამთავროთ ეს ჯოჯოხეთი, რომელშიც უკვე 200 წელზე მეტია გვამყოფებს რუსეთი. ჩვენ ივანიშვილს დავამხობთ, აუცილებლად დავამხობთ," — ამბობს ახალაია.

შეგახსენებთ, 2025 წლის 25 დეკემბერს 4 ოქტომბრის საქმის ორგანიზების ბრალდებით ბაჩო ახალაია დააკავეს. დაკავებას ტელეკომპანია "იმედის" მიერ გავრცელებული აუდიოჩანაწერი უძღოდა წინ, სადაც, ტელეკომპანიის მტკიცებით, პაატა ბურჭულაძე და ბაჩო ახალაია 4 ოქტომბრის აქციაზე "სახელმწიფო გადატრიალებას გეგმავდნენ".

პროკურატურის მტკიცებით, ბაჩო ახალაია 4 ოქტომბრის საქმის "მთავარი ორგანიზატორია" და აქციის დღეს მან სხვა ორგანიზატორებთან "სატელეფონო ინტერნეტ-კომუნიკაცია ინტერნეტ-აპლიკაციების მეშვეობით 343-ჯერ განახორციელა".

პაატა ბურჭულაძესთან — 110-ჯერ;
მურთაზ ზოდელავასთან — 157-ჯერ;
პაატა მანჯგალაძესთან — 29-ჯერ;
ლაშა ბერიძესთან — 26-ჯერ;
ირაკლი ნადირაძესთან — 21-ჯერ;

ბაჩო ახალაია ასევე დაკავშირებულია დიდი ოდენობით იარაღის, საბრძოლო მასალისა და ასაფეთქებელი მასალების შეძენა-შენახვის საქმესთან, რომელიც პროკურატურის ვერსიით 4 ოქტომბრის საქმესთან არის დაკავშირებული.

ყოფილ თავდაცვის და შს მინისტრს ჯგუფური ძალადობის ბრალდებას ედავებიან და მას ამ დანაშაულისთვის 9 წლამდე პატიმრობა ემუქრება.