დღეს, 14 იანვარს, 11:00 საათზე ბათუმის საქალაქო სასამართლოში ბათუმელებისა და ნეტგაზეთის დამფუძნებლისა და დირექტორის, მზია ამაღლობელის სასამართლო პროცესი გაიმართება, სადაც მის მიმართ აღკვეთის ღონისძიების შეფარდებაზე იქნება მსჯელობა.

პროკურატურამ მას ბრალი სისხლის სამართლის კოდექსის 353-ე პრიმა მუხლის პირველი ნაწილით გუშინ წაუყენა, რაც პოლიციელზე თავდასხმას გულისხმობს და 4-7 წლით პატიმრობით ისჯება.

"ბათუმელების" და "ნეტგაზეთის" დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

ტელეკომპანია იმედის გავრცელებულ კადრებში ჩანს, რომ მზია ამაღლობელი აჭარის პოლიციის უფროსს ირაკლი დგებუაძეს ელაპარაკება, ის ზურგს აქცევს ამაღლობელს, შემდეგ ამაღლობელი მკლავზე მოქაჩავს დგებუაძეს და სილას აწნავს, რის შემდეგაც მას აკავებენ.

"ბათუმელები“/"ნეტგაზეთი“ ავრცელებს კიდევ ვიდეოს და ინფორმაციას, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს. გამოცემის ცნობით, ვიდეოში ისმის დგებუაძის სიტყვები: "სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს".

დაკავებისას ადგილზე მყოფი ბათუმელების რედაქტორი ეთერ თურაძე ჰყვება, რომ "მზია ჭყლეტაში მოყვა. შოკისმომგვრელი და აფექტური მდგომარეობა იყო, რადგან პოლიციამ აბსოლუტურად მშვიდ გარემოში ატეხა პანიკა და მშვიდობიანი მოქალაქეების დაკავება დაიწყო. მზია ისევ ხელახლა შეათრიეს პოლიციის შენობაში. ის რომ მზია თავს დაესხა პოლიციას, არის აბსურდი, პირიქით, პოლიცია დაესხა თავს".

აღსანიშნავია ისიც, რომ 13 იანვარს, ქალაქის მერმა, კახა კალაძემ მხარდაჭერა გამოუცხადა იმ პოლიციელს, რომელმაც მზია ამაღლობელი დააკავა.

"ჩემი მხარდაჭერა ძალიან მაგარ ადამიანს, ღირსეულ ქართველს და ღირსეულ პოლიციელს, ირაკლი დგებუაძეს.

ეს ახალგაზრდა კაცი 24 საათი დგას ბათუმელების სიმშვიდისა და უსაფრთხოების სადარაჯოზე. სწორედ ამიტომ, ბოლო პერიოდში ირაკლი ფაშისტური ბულინგის და ფიზიკური შეტევის განსაკუთრებული ობიექტი გახდა, მაგრამ მის გუნდთან ერთად, ის ყველა გამოწვევას ღირსეულად პასუხობს. მადლობა ყველა პოლიციელს, ვინც ღირსეულად ემსახურება საკუთარ ქვეყანას და ხალხს," — დაწერა თბილისის მერმა კახა კალაძემ.

მზია ამაღლობელი დაკავებას უკვე გამოეხმაურნენ: დამოუკიდებელი მედიასაშუალებების, პროფესიული და მედიის უფლებების დამცველი ორგანიზაციები, მედიაომბუდსმენი, მედიის ადვოკატების კოალიცია, საია, საერთაშორისო ორგანიზაცია Women Press Freedom, ჰელსინკის კომისიის თავმჯდომარე და რესპუბლიკელი ჯო უილსონი. ისინი შსს-ს მის დაუყოვნებლივ გათავისუფლებას სთხოვენ.

11 იანვარს მზია ამაღლობელის სოლიდარობის ნიშნად მედიის წარმომადგენლები თბილისში, მთავრობის კანცელარიის შენობასთან შეიკრიბნენ და ის სტიკერები გააკრეს, რის გამოც, ის 11 იანვარს პირველად დააკავეს.

ადგილზე ჟურნალისტებმა წაიკითხეს დამოუკიდებელი მედიასაშუალებების, პროფესიული და მედიის უფლებების დამცველი ორგანიზაციების ერთობლივი განცხადება, სადაც ჟურნალისტები შსს-ს მოუწოდებენ, რომ მზია ამაღლობელი დაუყოვნებლივ ყოფილიყო გათავისუფლებული.

"ბათუმელების" და "ნეტგაზეთის" დამფუძნებლისა და დირექტორის, მზია ამაღლობელის "უკანონო" დაკავების ფაქტს გამოეხმაურა მედიის ადვოკატების კოალიცია და მისი დაუყოვნებლივ გათავისუფლება მოითხოვა.

დღეს მედიაომბუდსმენმა, ნათია კაპანაძემ გაავრცელა გაავრცელა, სადაც ის მოსამართლეს მიმართვას, რომ მზია ამაღლობელი გირაოს სანაცვლოდ გაათავისუფლოს.

ახალგაზრდა იურისტთა ასოციაცია (საია) მიიჩნევს, რომ ამ საქმეში არ არსებობს პატიმრობის გამოყენების საფუძველი. პატიმრობა, როგორც აღკვეთის ღონისძიება, უნდა გამოიყენებოდეს მხოლოდ უკიდურეს შემთხვევებში, როდესაც არსებობს რეალური საფრთხე, რომ ბრალდებული მიიმალება, ზემოქმედებას მოახდენს მოწმეებზე ან სხვა ფორმით შეუშლის ხელს გამოძიებას. მზია ამაღლობელის მხრიდან კი არ არსებობს მსგავსი საფრთხეები.

მზია ამაღლობელის დაკავებას X-ზე გამოეხმაურა Women Press Freedom. ორგანიზაცია ითხოვს, რომ მოეხსნათ ბრალი და შეწყდეს დამოუკიდებელი ჟურნალისტების დევნა საქართველოში.

"ამაღლობელი და მისი კოლეგები აშუქებდნენ, როგორ უსამართლოდ აკავებდა [დემონსტრანტებს] ბათუმის პოლიცია. ვითხოვთ, მოეხსნათ ბრალი და შეწყდეს დამოუკიდებელი ჟურნალისტების დევნა საქართველოში", — წერია განცხადებაში.

"ბათუმელების" და "ნეტგაზეთის" დამფუძნებლისა და დირექტორის დაკავებას გამოეხმაურა ასევე ჰელსინკის კომისიის“ თავმჯდომარე, რესპუბლიკელი სენატორი ჯო უილსონი. ის X-ზე წერს: "მზია ამაღლობელი და ივანიშვილის რეჟიმის ყველა პოლიტპატიმარი დაუყოვნებლივ უნდა გათავისუფლდეს".

"მზია ამაღლობელი და ივანიშვილის რეჟიმის ყველა პოლიტპატიმარი დაუყოვნებლივ უნდა გათავისუფლდეს. უნდა ჩატარდეს თავისუფალი და სამართლიანი არჩევნები", — წერს ჯო უილსონი.