ჭიათურაში, შუქრუთის მაღაროში, სავარაუდოდ, გულის შეტევით 50 წლამდე მაღაროელი გარდაიცვალა. ამის შესახებ ინფორმაციას მაღაროელი ტარიელ მიქაცაძე ავრცელებს. მისი თქმით მაღაროს ხელმძღვანელობას არ სურს მომხდარის გახმაურება, 2 დღე გავიდა და როგორც ადგილობრივი, ისე ცენტრალური მედიასაშუალებები დუმან.

"ჭიათურაში კერძოდ შუქრუთის მაღაროში მუშა გარდაიცვალა. შემთხვევა 2026 წლის 25 მარტს მოხდა, ღამით სავარაუდოდ. ინფორმაცია ძალიან ჩაკეტილი, იმის მიუხედავად, რომ თითქმის 2 დღე გავიდა, ადგილობრივი და ცენტრალური მედიასაშუალებები დუმან. გარდაცვლილის სახელი და გვარია ჯეირან ასლანდია, ადამიანი, რომელიც დევნილია აფხაზეთიდან, 90-იანი წლებიდან ცხოვრობს ჭიათურაში, მუშათა საერთო საცხოვრებელში. ჯეირანის სავარაუდო ასაკი ალბათ 50 წელი იქნებოდა. ასეთი ახალგაზრდა გამოეცალა ჭიათურას, საქართველოს", — ამბობს მაღაროელი ტარიელ მიქაცაძე.

ტარიელ მიქაცაძე ამბობს, რომ ჯეირანი სავარაუდოდ გულის შეტევით გარდაიცვალა.

"მაღაროში არ არის ნორმალური განიავების საშუალება, რაც იწვევს უჰაერობას და რაც შესაბამისად აავადებს ადამიანს და იწვევს ასეთ ფატალურ შემთხვევას", — ამბობს ტარიელ მიქაცაძე.