11-12 იანვარს "ბათუმელების" და "ნეტგაზეთის" დამფუძნებელი და დირექტორი, მზია ამაღლობელი დააკავეს. მის წინააღმდეგ გამოძიებაა დაწყებული სისხლის სამართლის კოდექსის 353 პრიმა მუხლის პირველი ნაწილით. ინფორმაციას გამოცემა "ბათუმელები" ავრცელებს.

ამაღლობელი, გუშინ და დღეს ორჯერ დააკავეს ბათუმის პოლიციის მთავარ სამმართველოსთან. პირველად იგი სტიკერის გაკვრის გამო, რომელსაც ჰქონდა წარწერა — "გაიფიცე", ხოლო ორი საათის შემდეგ გამოუშვეს, თუმცა მალევე ხელახლა დააკავეს.

როგორც ამაღლობელის ოჯახმა გამომძიებელს აცნობა, "ბათუმელების" და "ნეტგაზეთის" დირექტორის წინააღმდეგ გამოძიება დაიწყო სისხლის სამართლის კოდექსის 353 პრიმა მუხლის პირველი ნაწილით – პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე ანდა საჯარო დაწესებულებაზე თავდასხმის ბრალდებით.

აღნიშნული მუხლის თანახმად, "პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე, ანდა მის სამსახურებრივ ან საცხოვრებელ შენობაზე, ან მის სატრანსპორტო საშუალებაზე, ანდა მისი ოჯახის წევრზე თავდასხმა პოლიციელის, სპეციალური პენიტენციური სამსახურის მოსამსახურის ან ხელისუფლების სხვა წარმომადგენლის სამსახურებრივ საქმიანობასთან დაკავშირებით, ისჯება თავისუფლების აღკვეთით ვადით ოთხიდან შვიდ წლამდე".

გავრცელებული ინფორმაციით, ამაღლობელთან ადვოკატებს 3 საათის განმავლობაში არ უშვებდნენ, ამასთან უცნობი იყო, თუ რა მუხლით იყო იგი დაკავებული. მოგვიანებით, სახალხო დამცველის წარმომადგენელმა მზია ამაღლობელი მოინახულა, რომლისგანაც მოისმინა, რომ დაკავების შემდგომ არასათანადო მოპყრობას ჰქონდა ადგილი.

ადვოკატები მზია ამაღლობელთან რამდენიმესაათიანი ლოდინის შემდეგ 12 იანვარს, ღამის 3 საათზე გამოუშვეს.

მოგვიანებით შეხვედრიდან გამოსულმა ადვოკატებმა დაადასტურეს, რომ გამოძიება მიმდინარეობს 353 პრიმა მუხლის პირველი ნაწილით, თუმცა ოფიციალურად მას ბრალი წარდგენილი არ აქვს. ადვოკატებისთვის საქმის მასალები გამოძიებას ჯერ არ გადაუცია.

მზია ამაღლობელს ბრალი უახლოეს 48 საათში უნდა წარუდგინონ.