ჯოან როულინგის ჯადოსნური სამყაროს დიდ ეკრანზე პირველად გაცოცხლებიდან 25 წელი გადის. ამასობაში კი, პოტერიადა ახალ სიცოცხლესაც იძენს — HBO Max ლეგენდარულ ფენტეზი საგას სერიალად იღებს. სერიალის ტრეილერი ორიოდე დღის წინ გამოვიდა, მის პირველ სეზონს კი წლის ბოლოს ვიხილავთ.

თუმცა, იმის მიუხედავადაც, რომ ჰარი პოტერის პოპულარობას წლები ვერაფერს აკლებს, როგორც ჩანს, მაინც არსებობს ხალხი, რომელსაც ბლოკბასტერი ფილმების სერია აქამდე არ უნახავს. მათ შორის ყოფილა ცნობილი ბრიტანელ-ამერიკელი მსახიობი ენდრიუ გარფილდი, რომელმაც ამ საკითხზე უახლეს ინტერვიუში ისაუბრა. გარფილდის თქმით, პოტერიადის კინოსერიას სულ ახლახან უყურა, იმის მიუხედავად, რომ ამ გადაწყვეტილებას საკამათოდ მიიჩნევს წიგნების ავტორის, ჯოან როულინგის, შეხედულებების გამო. მეტიც, ინტერვიუში გარფილდს მწერალი სახელით არ მოუხსენიებია — "ის, ვისი სახელიც არ ითქმის" ასე მიუთითა მსახიობმა როულინგზე. ზუსტად ასე მოიხსენიებენ ჰარი პოტერის სამყაროში მთავარ ბოროტმოქმედს, ლორდ ვოლდემორს.

"დენიელი [ფილმებში მთავარი როლის შემსრულებელი დენიელ რედკლიფი] არაჩვეულებრივად თამაშობს", — აღნიშნავს ენდრიუ გარფილდი, — "სიმართლე გითხრათ, ამ ბოლო ხანებამდე ჰარი პოტერი ნანახი არ მქონდა. დენიელის შესრულება კი ამ ფილმებში მართლაც შესანიშნავია. თვითონ ფილმებიც ძალიან კარგია. ვიცი, რომ ეს საკამათო საკითხია და არ უნდა ვამდიდრებდეთ არაჰუმანურ სამართალს მისი მეშვეობით, ვისი სახელიც არ ითქმის. თუმცა, ამ ფილმებზე უამრავმა შესანიშნავმა ხელოვანმა იმუშავა. მათ ახლა სულ სხვა მოწიწებით ვუყურებ. ერთ-ერთი მათგანი სწორედ დენიელია".

დენიელი იყო აგრეთვე ერთ-ერთი ჰარი პოტერის იმ ვარსკვლავებიდან, რომლებიც როულინგის შეხედულებებს გენდერულ საკითხებზე ღიად დაუპირისპირდნენ. ტრანსფობიაში არაერთხელ დადანაშაულებული მწერლის განცხადებებს ასევე ირიბად უპასუხეს პოტერიადაში სხვა მთავარი როლების შემსრულებლებმა, რუპერტ გრინტმა (რონ უისლი) და ემა უოტსონმაც (ჰერმიონ გრეინჯერი). შედეგად, ავტორსა და მსახიობებს შორის ურთიერთობა ისე დაიძაბა, რომ შეკითხვაზე, თუ რომელი კინოვარსკვლავები აკარგვინებენ ფილმისადმი ინტერესს თავიდანვე, როულინგმა სწორედ პოტერიადის სამეულზე მიანიშნა. მეტიც, მწერალმა თქვა, რომ სამეულს მათ განცხადებებს "არასდროს აპატიებს".

აღსანიშნავია, რომ როულინგს პოტერიადის რამდენიმე ვარსკვლავი გამოექომაგა, მათ შორის, ტომ ფელტონი (დრაკო მალფოი), ჰელენა ბონემ კარტერი (ბელატრის ლესტრეინჯი) და ედი რედმეინი (ნიუტ სკამანდერი ჯადოსნური ცხოველების სერიაში). მწერალს მხარი დაუჭირა ჰარი პოტერის ფილმების შემქმნელმა კინოსტუდია Warner Bros.-მაც.

ფოტო: Getty Images

საზოგადოების ნაწილის მხრიდან კრიტიკა მოჰყვა HBO-ის ეკრანიზაციაში, როგორც როულინგთან ასოცირებულ პროექტში, მსახიობების მონაწილეობასაც. ჰარი პოტერის სერიალში ალბუს დამბლდორის როლის შემსრულებელმა ჯონ ლითგოუმ ინტერვიუში თქვა, რომ უარყოფითი გამოხმაურების გამო როლი ლამის დატოვა კიდეც. როულინგისგან რადიკალურად განსხვავებული პოზიცია აქვს სევერუს სნეიპის როლის ახალ შემსრულებელსაც, პააპა ესიედუს.

სერიალში კი როულინგის როლი მეტია, ვიდრე, უბრალოდ, ასოცირება. იგი პროექტის აღმასრულებელი პროდიუსერის როლში გვევლინება. მწერალი ცოტა ხნის წინ გამოეხმაურა კიდეც ტრეილერის გამოსვლას და აღნიშნა, რომ "შედეგით კმაყოფილია".