დეა კულუმბეგაშვილი მისი პირველი მხატვრული ფილმის — აპრილის — შემდეგ ახალ, ჯერჯერობით საიდუმლო ფილმზე მუშაობს.

ქართველი რეჟისორი ახალ ფილმზე ინფორმაციის გავრცელებას ერიდება, თუმცა მის შესახებ რამდენიმე დეტალი მაინც ვიცით. ფილმი, დეას წარსული ნამუშევრების მსგავსად, ქალებსა და ბავშვებს შეეხება და ამჯერად აშშ-ში იქნება გადაღებული.

ეს დეას პირველი ფილმი იქნება, რომელსაც საქართველოს გარეთ შექმნის: "მესმის, რომ არსებობს კონკრეტული ფილმები, რომელთა შექმნასაც საქართველოში ვერც კი გავბედავ. იდეა, რომ ამას ვერ გავაკეთებ, რადგან მრავალ ადამიანს ჩავაგდებ საფრთხეში, ჩემთვის ძალიან დამთრგუნველია".

აპრილი

აპრილი

ფოტო: Venice Film Festival

კულუმბეგაშვილის პირველი ინგლისურენოვანი ფილმი კი Fruit Tree Productions-თან თანამშრომლობით შეიქმნება — კომპანიასთან, რომელიც ემა სტოუნსა და დეივ მაკკრის ეკუთვნის. როგორც დეა ამბობს, კომპანიასთან მოლაპარაკება აპრილამდე დაიწყო: "ძალიან მომთმენები არიან და ჩემი შემოქმედებითი პროცესის მიმართ გაგებას იჩენენ. მათ მუშაობის სტილს ძალიან ვაფასებ".

ემა სტოუნი და დეივ მაკკრი

ემა სტოუნი და დეივ მაკკრი

ფოტო: Getty Images

როგორც ქართველი რეჟისორი ამბობს, ეს ფილმი მისთვის ახალი გამოწვევა და განვითარების შესაძლებლობაა. ემასთან მუშაობით კი ძალიან კმაყოფილია: "ემა სტოუნთან თანამშრომლობა საოცარია. ის არა მხოლოდ ბრწყინვალე მსახიობია, არამედ ისეთ რისკებზეც მიდის, რომლებიც ჰოლივუდს ყოველთვის არ მოსწონს. ის მზადაა, რომ გამოიწვიოს ინდუსტრია და იმუშაოს პროექტებზე, რომლებიც არსებულ საზღვრებს არღვევს, ეს ყველაფერი კი თავად ამ ინდუსტრიის გადააზრებაში გვეხმარება. ეს სწორედ ისეთი სიმამაცეა, რომელსაც ცვლილებები მოაქვს".

ვფიქრობ, რომ ეს ყურადღება მნიშვნელოვანია. მნიშვნელოვანია, რადგან ეს ნიშნავს, რომ ქართულ კინოს თავისი სიტყვა ეთქმის — ამბობს დეა.