პოლიციაზე თავდასხმაში ბრალდებულის, 21 წლის მათე დევიძის სასამართლო პროცესი დღეს, 16 იანვარს გაიმართა, სადაც ბრალდებულმა მოსამართლე დავით მგელიაშვილს სიტყვით მიმართა.

როგორც დევიძემ მოსამართლეს უთხრა, მის მიმართ შეფარდებული აღკვეთის ღონისძიების გადასინჯვისას — ის პატიმრობას არ იმსახურებს.

"იმ ინციდენტის შემდეგ არ გაითვალისწინა მოსამართლემ ჩემი ოჯახური მდგომარეობა, არც ჩემი წარსული, მომწყვიტა ჩემს ოჯახს, საყვარელ მეგობრებს, ჩემი გიტარა მენატრება. პატიმრობა ეს არის ყველაზე უკიდურესი ვარიანტი, ჩემს პირობებში არანაირად არ ვიმსახურებ ამას", — განაცხადა დევიძემ.

შეგახსენებთ, მათე დევიძე ნოემბრის პროევროპულ აქციებზე სხვა 15 ადამიანთან ერთად დააკავეს. აქცია მელიქიშვილის გამზირზე იმართებოდა და სამართალდამცავებმა მოქალაქეები ადმინისტრაციული წესით დააკავეს. მას, ისევე როგორც სხვებს, ედავებოდნენ პოლიციელის დაუმორჩილებლობას და წვრილმანი ხულიგნობის ჩადენას, თუმცა 48-საათიანი ადმინისტრაციული პატიმრობის ვადის ამოწურვის შემდეგ, როცა ის იზოლატორიდან უნდა გაეშვათ, მუხლი შეუცვალეს და ახლა გამოძიება უკვე სისხლის სამართლის შესაძლო დანაშაულის ჩადენისთვის მიმდინარეობს.

დევიძეს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს.