"ბათუმელების" და "ნეტგაზეთის" დამფუძნებლის, მზია ამაღლობელის დაკავების შესახებ მისი ადვოკატი, საიას აჭარის ფილიალის ხელმძღვანელი, თამარ წულუკიძე NEWS.On.ge სთან საუბრობს და ამბობს, რომ ამაღლობელის საქმის შესწავლა სისხლის სამართლის წარმოებით მიმდინარეობს.

ადვოკატის თქმით, ამაღლობელის ბათუმის იზოლატორში გადაიყვანეს. ამასთან, წულუკიძე აღნიშნავს, რომ ამაღლობელს 48 საათის განმავლობაში ოფიციალურად წარუდგენენ ბრალს.

"მზიასთან შეხვედრის შესაძლებლობა მოგვეცა. ფაქტობრივად 3 საათი ველოდებოდით რომ მოეცათ ჩვენთვის შესაძლებლობა, რომ შევსულიყავით მის სანახავად. სისხლის სამართლის წარმოებით მიმდინარეობს საქმის შესწავლა, 353-ე პრიმა მუხლის პირველი ნაწილი — ეს არის მუხლი რომელსაც იყენებენ. [მზია ამაღლობელი] ბათუმის იზოლატორში გადაიყვანეს. 48 საათში უნდა წარუდგინონ ოფიციალურად ბრალი, შემდეგ უნდა იმსჯელონ აღკვეთის ღონისძიების საკითხზე და ველოდებით ამ ეტაპების განვითარებას და გავლას", — ამბობს თამარ წულუკიძე.

ამაღლობელის ადვოკატის თქმით, დაკავებული ბათუმში მომხდარი დაპირისპირების დროს ჭყლეტაში მოყვა, რის გამოც დაზიანებული აქვს მკლავი.

"ამ ეტაპზე, დაკავებული დუმილის უფლებას იყენებს და არ საუბრობს. ერთადერთი, რაც ჩვენ კადრებში შეგვიძლია ვნახოთ არის ის რომ ფაქტობრივად ჭყლეტაში მოყვა ის და დაზიანებული აქვს მკლავი, დამატებით საკითხზე ის შემდგომ ისაუბრებს, ამ ეტაპზე ის დუმილის უფლების სარგებლობს", — ამბობს მზია ამაღლობელის ადვოკატი, თამარ წულუკიძე.