წერილი გამოგზავნეს, სისხლის სამართლის საქმეზე მიმდინარეობს გამოძიებაო, — ამის შესახებ სოციალურ ქსელში აქტივისტი ნიკო მანაგაძე წერს, რომელიც პოლიციამ 14 დეკემბერს ადმინისტრაციული წესით დააკავა. ის წერს, რომ დაკავებისას ჩამორთმეული ყველა ნივთი — iPhone 15 Pro, გასაღები, საბანკო ბარათები, ფაუერბანკი, დამტენი, ხელთათმანები და ბალაკლავა, დაიტოვეს.

"წერილი გამოგზავნეს, სისხლის სამართლის საქმეზე მიმდინარეობს გამოძიებაო და დაკავებისას ჩამორთმეული ყველა ნივთი საბოლოოდ დაიტოვეს (iPhone 15 Pro, გასაღები, საბანკო ბარათები, ფაუერბანკი, დამტენი, თავდასაცავი სპრეი, ხელთათმანები, ბალაკლავა — სერიოზული მასალა გაჩნდება საქმეში) აქ, რა თქმა უნდა, მთავარი პრობლემა ტელეფონშია. მოკლედ, ქურდებმა საკუთარი საქმე გააკეთეს. მე ვიზამ რაღაცას, მარა თქვენ რა გეშველებათ…" — წერს აქტივისტი ნიკო მანაგაძე სოციალურ ქსელში.

ნიკო მანაგაძე 14 დეკემბერს ადმინისტრაციული წესით დააკავეს, კერძოდ, 173-ე მუხლის პირველი ნაწილით, რაც პოლიციის მოთხოვნისადმი დაუმორჩილებლობასა და პოლიციის შეურაცხყოფას გულისხმობს. აქტივისტს თბილისის საქალაქო სასამართლომ ოთხდღიანი ადმინისტრაციული პატიმრობა შეუფარდა.