BBC-ი პალესტინურ მედიაზე დაყრდნობით წერს, რომ ღაზაში, ისრაელის თავდასხმას ხუთი ჟურნალისტი ემსხვერპლა.

მედიის ცნობით, ისინი Quds Today-ს ფურგონში იმყოფებოდნენ, რომელიც ალ-ავდას საავადმყოფოსთან იდგა, სადაც ერთ-ერთი ჟურნალისტის ცოლი მშობიარობდა.

პალესტინურმა არხმა გაავრცელა ვიდეო, სადაც ჩანს თუ როგორ იწვის მანქანა, რომელსაც აწერია "პრესა".

მიიჩნევა, რომ Quds Today პალესტინის ისლამურ ჯიჰადს (PIJ), შეიარაღებულ დაჯგუფებას უკავშირდება.

ამასთან, გუშინ, 26 დეკემბერს ღაზას ჩრდილოეთით მდებარე საავადმყოფოს კამალ ადვანის დირექტორმა, განაცხადა, რომ ისრაელის მხრიდან საავადმყოფოზე თავდასხმის შედეგად, დაახლოებით 50 ადამიანი დაიღუპა, მათ შორის, ხუთი თანამშრომელი.

ამ თემაზე, ისრაელის თავდაცვის ძალებმა (IDF) განაცხადა, რომ არ იცოდა საავადმყოფოზე დარტყმების შესახებ და დასძინა, რომ განიხილავენ ხუთი ექიმის დაღუპვის შესახებ არსებულ მტკიცებულებებს.

მოგვიანებით, საავადმყოფოს დირექტორმა დასძინა, რომ "დაღუპულთა რიცხვი, რომელიც გამოქვეყნებულია მედიაში, არ ემთხვევა IDF-ის მიერ გავრცელებულ ინფორმაციას".

ჟურნალისტთა დაცვის კომიტეტმა (CPJ) მოგვიანებით განცხადება გაავრცელა და აღნიშნა, რომ "ღაზას სექტორში ხუთი ჟურნალისტის მოკვლის შესახებ ცნობებით შეშფოთებულია“.

"ჟურნალისტები სამოქალაქო პირები არიან და ყოველთვის უნდა იყვნენ დაცული", — ამბობს CPJ.

შეგახსენებთ, 2023 წლის 7 ოქტომბერს, ისრაელის სამხედროებმა, ღაზას სექტორზე, ჰამასის შეტაკების საპასუხოდ საჰაერო თავდასხმები განახორციელეს.

ღაზას ჯანდაცვის მინისტრის თქმით, გასული წლიდან დღემდე, ისრაელის თავდასხმებს 45 000-ზე მეტი პალესტინელი ემსხვერპლა. გაეროს ცნობით, დაახლოებით ორი მილიონი ადამიანი — მოსახლეობის 90 % გადაასახლეს, ან მოუწია ქვეყნის დატოვება.