ორი წარუმატებელი ცდის შემდეგ, ევროსასამართლოში საქართველოდან ასარჩევი მოსამართლეების პოზიციაზე მთავრობამ კიდევ ორი კანდიდატი შეარჩია.

იუსტიციის სამინისტროს ცნობით, საქართველოს საკონსტიტუციო სასამართლოს მოქმედი მოსამართლის და თავმჯდომარის მოადგილის, ლალი ფაფიაშვილისა და თბილისის სააპელაციო სასამართლოს მოქმედი და საქართველოს საკონსტიტუციო სასამართლოს ყოფილი მოსამართლის, ოთარ სიჭინავას კანდიდატურები ევროპის საბჭოს 31 აგვისტომდე წარედგინება.

ვინ არის ლალი ფაფიაშვილი

ლალი ფაფიაშვილი საკონსტიტუციო სასამართლოს მოსამართლედ პარლამენტმა 2007 წელს დანიშნა. 2016 წელს საკონსტიტუციო სასამართლოს პლენუმმა ის სასამართლოს თავმჯდომარის მოადგილედ აირჩია.

ზუსტად ერთი წლის წინ, ტელეკომპანია რუსთავი 2-მა გაავრცელა ინფორმაცია, რომ ფაფიაშვილის დედას, ტატიანა ახლედიანს შესაძლოა სამართალდარღვევასთან ჰქონოდა კავშირი. რუსთავი 2-ის მტკიცებით, ხელისუფლება სწორედ ამ საქმეს იყენებს, რათა ზემოქმედება მოეხდინა მოსამართლე ლალი ფაფიაშვილზე, რომელსაც სასამართლოში უნდა განეხილა ტელეკომპანიის საქმე.

თავად ლალი ფაფიაშვილი დედამისის ბრალეულობას უარყოფდა და აცხადებდა, რომ დანაშაული ჩადენის შემთხვევაში ის პასუხისგებაში აუცილებლად მიეცემოდა. ბრალდების გამო, ფაფიაშვილმა პლენუმს გახმაურებული საქმეების, ე.წ კაბელების საქმის, გიგი უგულავას და რუსთავი 2-ის საქმეებზე თვითგანრიდების შუამდგომლობით მიმართა.

საკონსტიტუციო სასამართლოს ინფრომაციით, ლალი ფაფიაშვილი 2011 წლიდან არის თსუ იურიდიული ფაკულტეტის პროფესორი. სხვადასხვა დროს მუშაობდა ადამიანით ვაჭრობის (ტრეფიკინგის), ოჯახში ძალადობის, ადამიანის უფლებების საკითხებზე.

ვინ არის ოთარ სიჭინავა

ოთარ სიჭინავა ერთ-ერთი იყო იმ მოსამართლეებს შორის, რომელიც საკონსტიტუციო სასამართლოში თბილისის ყოფილი მერის გიგი უგულავასა და ე.წ. კაბელების საქმეს განიხილავდა. 2016 წლის სექტემბერში სხდომები მეორედ პლენუმის გამოუცხადებლობის გამო ჩაიშალა. მაშინ, როცა სიჭინავა ბათუმში პროცესზე უნდა ყოფილიყო, თბილისში ძაღლებს ასეირნებდა.

ოთარ სიჭინავა საკონსტიტუციო სასამართლოს მოსამართლის თანამდებობაზე 2006 წლიდან 2016 წლამდე მუშაობდა. 2017 წლის 11 მაისს ის სააპელაციო სასამართლოს უვადო მოსამართლედ დაინიშნა.

მოქმედ ხელისუფლებას სტრასბურგში წარსადგენი მოსამართლეობის კანდიდატების შესარჩევად კონკურსის გამოცხადება მესამედ, 25 ივლისს მოუწია. ხელისუფლების მიერ შერჩეული კანდიდატები სტრასბურგმა დაიწუნა. ბოლოს ხელისუფლებამ ლადო ჭანტურია, სოფიო ჯაფარიძე და შოთა გეწაძე შეარჩია, თუმცა სტრასბურგში მათგან მხოლოდ ერთი, ლადო ჭანტურია მოიწონეს. სწორედ დანარჩენი ორი კანდიდატის ჩასანაცვლებლად მოუწია საქართველოს მთავრობასაც ახალი კონკურსის გამოცხადება.

აღნიშნული კონკურსის ფარგლებში მოსამართლეობის სურვილი 28 პირმა გამოთქვა. სპეციალურმა სამთავრობო კომისიამ გასაუბრებაზე მხოლოდ 8 პირი დაიბარა, რომელთაგან შვიდს ინდივიდუალურად გაესაუბრა, მერვე გასაუბრებაზე არ გამოცხადდა.

ქულათა დაჯამების შედეგად გამოვლინდა ოთხი კანდიდატი, რომლებმაც ყველაზე მაღალი შედეგი აჩვენეს:

• ლალი ფაფიაშვილი - 4.82;
• თამარ ალანია - 4.45;
• იოსებ ბაჩიაშვილი - 3.73;
• ოთარ სიჭინავა - 3.73.

დადგენილი წესის თანახმად, სია გენდერული ნიშნით შედგა.

სტრასბურგის სასამართლოს მოსამართლეობის კანდიდატების ასარჩევ კომისიას ბოიკოტი გამოუცხადა კოალიციამ დამოუკიდებელი და გამჭვირვალე მართლმსაჯულებისთვის. კოალიციას მიაჩნია, რომ ხელისუფლების მიზანია წინასწარ განსაზღვრული კანდიდატების უპირობო მხარდაჭერა, რის გამოც აზრი ეკარგება მათ კომისიაში ჩართულობას.