სამეფო კარის თამაშების გრანდიოზული ფინალის შემდეგ სერიალის მაყურებლებს ისღა დაგვრჩენია მერვე სეზონის პრემიერას დაველოდოთ, რომელიც სავარაუდოდ 2019 წლამდე არ გვეღირსება. მაგრამ ამ როლების შემსრულებელი მსახიობების ნახვა, ფინალის მოლოდინში, სხვადასხვა სერიალებსა თუ ფილმებში შეგვეძლება.

პიტერ დინკლიჯი

ტირიონ ლანისტერის როლის შემსრულებელი პიტერ დინკლიჯი მალე ახალ ბიოგრაფიულ ფილმში, My Dinner with Hervé, მსახიობი ერვი ვილენჩეზის როლს შეასრულებს. ამავდროულად მის სამომავლო პროექტებში მარტინ მაკდონაჰის ფილმი Three Billboards Outside Ebbing, Missouri გვხვდება. The Handmaid's Tale-ის ერთ-ერთი რეჟისორის, რიდ მორენოს პროექტში, I Think We’re Alone Now, კი პიტერი პარტნიორობას ელ ფენინგს გაუწევს.

ემილია კლარკი

დიდი ალბათობით, უკვე გეცოდინებათ, რომ კლარკის ვარსკვლავური ომების ახალ ნაწილში ერთ-ერთ როლს შეასრულებს, თუმცა ეს, რა თქმა უნდა, ყველაფერი არ არის. ემილია ახალ კრიმინალურ ტრილერში Above Suspicion მთავარ როლს შეასრულებს.

კიტ ჰარინგტონი

ჯონ სნოუს ყურადღება არასდროს აკლდა, განსაკუთრებით ამ სეზონში. რაც შეეხება სამომავლო პროექტებს, კიტი BBC-ის ახალ სერიალში, Gunpowder, გაი ფოქსის თანამზრახველის როლში მოგვევლინება. ამავდროულად მალე ვიხილავთ რეჟისორ ქსავიე დოლანის ახალ ფილმსაც The Life and Death of John F. Donovan. ფილმში მასთან ერთად ითამაშებენ ნატალი პორტმანი, ჯეიკობ თრამბლი, ჯესიკა ჩესტეინი, სიუზან სარანდონი და ქეთი ბეიტსი.

ნიკოლაი კოსტერ-ვალდაუ

კოსტერ-ვალდაუ HBO-დან დროებით ნეტფლიქსის ეკრანზე გადაინაცვლებს და Small Crimes-სში მიიღებს მონაწილეობას, პარალელურად ის ბრაიან დე პალმას ფილმში Domino მთავარ როლს შეასრულებს.

ლინა ჰედი

ლინა ჰედი დროებით სერსეი ლანისტერის ამპლუიდან გამოვა და კომედიურ დრამაში ჯულია ნაითის როლს შეასრულებს. ფილმი Fighting with My Family ოჯახის ისტორიას მოგვითხრობს, რომლის ყველა წევრიც მოკრივეა, კომედიაში მისი პარტნიორი კი დუეინ ჯონსონი იქნება. კიდევ ერთი ფილმი, რომელშიც ლინას ვიხილავთ ენტონი ვუდლის დრამა The Flood არის, რომლის პრემიერაც 2018 წელს იგეგმება.

სოფია ტერნერი

სანსა სტარკის როლის შემსრულებლის კარიერული ცხოვრება პოსტ-ვესტეროსული ცხოვრების მიღმა საკმაოდ დატვირთულია. სოფიას მისი გულშემატკივრები სულ მალე X-Men-ის სერიების ახალ ფილმში Dark Phoenix-ში იხილავენ, სადაც მასთან ერთად ჯესიკა ჩესტეინიც მიიღებს მონაწილეობას. პარალელურად ტერნერი ჰოლივუდის ვარსკვლავებთან - რენე ზელვეგერთან, ჯარედ ლეტოსთან და გრეის ანატომიის პატრიკ დემპსისთან ერთად ახალ მხატვრულ ფილმში Berlin, I Love You ითამაშებენ.

მეისი უილიამსი

სოფია ტერნერის მსგავსად, მეისი X-Men-ის სერიების ახალ ფილმში New Mutants ერთ-ერთ მთავარ როლს შეასრულებს. ფილმი ფოკუსირებული იქნება მუტანტებზე მსოფლიოს გარშემო, აქ შეხვდებით როგორც ინდოელ, ასევე ბრაზილიელ, რუს და სხვა ქვეყნის მუტანტებს. მეისის პერსონაჟი კი რელიგიური გოგო იქნება, რომელიც ცდილობს შეეგუოს ფაქტს, რომ მას მგლად გადაქცევა შეუძლია. მეისი მთავარ როლს შეასრულებს მარკ ლობატოს მოკლემეტრაჟიან ფილმში Stealing Silver.