რუსეთის სამართალდამცველთა პროფკავშირების ასოციაციის ხელმძღვანელი, ალექსეი ლობარევი სოციალურ ქსელებში წერს, რომ საქართველოში თავისი კოლეგების მოწვევით მივლინებით იმყოფებოდა, რომ ადგილზე გასცნობოდა "უკანონო ანტისამთავრობო აქციებით გამოწვეულ ვითარებას". მისი თქმით, ქართველების უმრავლესობას ძალიან ნეგატიური დამოკიდებულება აქვს მომიტინგეების მიმართ. ის აქებს პოლიციას და წერს, რომ შსს-ს თანამშრომლებმა "ამ ექსტრემალურ სიტუაციაში ღირსეულად გამოიჩინეს თავი. 150-ზე მეტი პოლიციელი კი ბუნტის მოქმედების შედეგად დაშავდა".

თბილისში ყოფნის შემდეგ, ალექსეი ლობარევს ორი მთავარი დასკვნა გამოაქვს. ერთი ის, რომ საღამოს და ღამის პროტესტის მიუხედავად, დღისით ქალაქი ჩვეულ რეჟიმში აგრძელებს ცხოვრებას და მეორე — მისი თქმით, საქართველოში რუსეთის მიმართ დამოკიდებულება ბოლო თვეებში შესამჩნევად შეიცვალა უკეთესობისკენ. "ქუჩებში, ბაზრებზე, მაღაზიებსა და კაფეებში რუსულად კარგად ვლაპარაკობდი, ჩემი ყველას ესმოდა და რუსულადვე მპასუხობდნენ?, — წერს ალექსეი ლობარევი.

"რა ხდება საქართველოში?

სანდო ცნობები მოვლენების ადგილიდან.

ასე განსხვავებულია თბილისი ღამით და დღეს…

როგორც რუსეთის სამართალდამცავი ორგანოების პროფკავშირების ასოციაციის ხელმძღვანელი და საერთაშორისო თანამშრომლობის კომისარი, საქართველოდან კოლეგების მოწვევით თბილისში მივლინებაში გავემგზავრე უკანონო ანტისამთავრობო აქციებით გამოწვეულ ვითარებასთან გასაცნობად.

დაუყოვნებლივ მინდა აღვნიშნო, რომ ქართველების უმრავლესობას ძალიან ნეგატიური დამოკიდებულება აქვს მომიტინგეების მიმართ.

საქართველოს შინაგან საქმეთა სამინისტროს თანამშრომლებმა ამ ექსტრემალურ სიტუაციაში ღირსეულად გამოიჩინეს თავი. 150-ზე მეტი პოლიციელი დაშავდა ბუნტის მონაწილეთა მოქმედებით: დამწვრობა, მოტეხილობა, თავისა და სახის დაზიანებები. ბოევიკების ორგანიზებულმა ჯგუფებმა გამოიყენეს პიროტექნიკა, მოლოტოვის კოქტეილები, ხელკეტები, სპილენძის მუწუკები და სპეციალური სროლებიც კი პოლიციის მანქანებისა და ოფიცრების წინააღმდეგ.

მინდა აღვნიშნო საქართველოს დედაქალაქის ორი მახასიათებელი:

1️. საღამოს და ღამის პროტესტის მიუხედავად, დღე თბილისი ჩვეულ რეჟიმში აგრძელებს ცხოვრებას.

2️. საქართველოში რუსეთის მიმართ დამოკიდებულება ბოლო თვეებში შესამჩნევად შეიცვალა უკეთესობისკენ. ქუჩებში, ბაზრებზე, მაღაზიებსა და კაფეებში რუსულად კარგად ვლაპარაკობდი, ჩემი ყველას ესმოდა და რუსულადვე მპასუხობდნენ.

მნიშვნელოვანია ვიცოდეთ, რომ პროფკავშირები პარტიებისა და პოლიტიკის მიღმაა. მათი მთავარი მიზანია მუშათა უფლებებისა და ინტერესების დაცვა, განურჩევლად პოლიტიკური ვითარებისა.

ახლა ვაჯამებ ყველა შეგროვებულ მასალას და რამდენიმე დღეში აუცილებლად გაგიზიარებთ თქვენ, მეგობრებს, ჩემს დასკვნებს და გაჩვენებთ ვიდეოს იმის შესახებ, თუ როგორ ცხოვრობს თბილისი დღე და ღამე", — წერს ალექსეი ლობარევი და პოლიციის თანამშრომლებთან გადაღებულ და თბილისის საპროტესტო აქციების ამსახველ ფოტოებს აქვეყნებს.

პოსტს და ფოტოებს 10 დეკემბერს აქვეყნებს. 13-ში კიდევ ორ ვიდეოს აზიარებს. ერთ მათგანში საქართველოში მოგზაურობაა აღწერილი — როგორ დადის თბილისის ქუჩებში, მაღაზიებსა და რესტორანში. მეორე ვიდეოში კი აქციის კადრებია, ბოლოს კი პოლიციასთან პოზირებს.

"პოლიცია ყოველთვის ერთიანი იყო, ჩვენ ყოველთვის გვესმოდა და პატივს ვცემდით ერთმანეთს", — ამბობს ლობარევი ვიდეოში.

ჩვენთვის უცნობია, ლობარევი შსს-ს თანამშრომლების მოწვევით იმყოფებოდა საქართველოში, თუ პროფკავშირების, ან საერთოდ ვინმეს მოწვევით იყო თუ არა ჩამოსული. დამატებითი ინფორმაციის მოპოვებისთანავე სტატია განახლდება.