მარნეულის მერია, ადგილობრივ მეწარმე ქალს — ნონა სამხარაძეს ბიზნესის დახურვა მოსთხოვა, სხვა შემთხვევაში, მას 600 ლარით დააჯარიმებენ. ამის შესახებ სამხარაძე "რადიო მარნეულთან" ინტერვიუში საუბრობს.

ახალგაზრდა ქალმა გამოთქვა საფუძვლიანი ეჭვი, რომ ადგილობრივი უწყების მხრიდან ბიზნესის დაკეტვის შესახებ მოთხოვნის მიზეზი, არის მისი აქტიური ჩართულობა ქვეყანაში მიმდინარე საპროტესტო აქციებში და განსხვავებული აზრის დაფიქსირება.

"მეც მომადგნენ! ჩემი კრიტიკული აზრის გამო მახურინებენ ყავის დრაივს. ორი წელია მძევლად ვყავარ აყვანილი ადგილობრივ თვითმმართველობას, არ მიწესრიგებენ საბუთებს, თან ეს ყველაფერი "აწარმოე საქართველოს" გრანტით გავაკეთე.
ჩემი ცხოვრება არც დრაივით დაწყებულა და არც დრაივით დამთავრებულა, ბრძოლა გრძელდება ჩვენი ევროპული მომავლისთვის!

დღეს 6 საათამდე მომცეს დრო, რომ ავიღო ჯიხური, თორემ 600 ლარით მაჯარიმებენ!
პ.ს ჩემს გვერდით ქართული ოცნების წარმომადგენელს აქვს დრაივიც, სამრეცხაოც და კალონკაც და საინტერესოა მასაც თუ აჯარიმებენ!", — წერს ნონა სამხარაძე

ამასთან, სამხარაძე რადიოსთან ინტერვიუში აღნიშნავს, რომ ინდმეწარმეს ყავის დრაივზე დასაქმებული ჰყავს ოთხი ადამიანი, ამიტომ იგი არ აპირებს ბიზნესის დახურვას, ელოდება მერიის მხრიდან დაჯარიმებას და შემდგომ უკვე გადაწყვეტილების სასამართლოში გასაჩივრებას.

რაც შეეხება ნონა სამხარაძეს, იგი არის მარნეულელი მეწარმე და აქტივისტი, რომელიც წლების განმავლობაში მუნიციპალიტეტში გენდერული თანასწორობის და სოფლის მეურნეობის განვითარების კუთხით მუშაობს.