გვითხრეს, რომ ანდროს ბრალი ედებოდა ჯგუფური ძალადობის მუხლით, — ამის შესახებ მსახიობ ანდრო ჭიჭინაძის მამა, ოთარ ჭიჭინაძე აცხადებს. მისი თქმით, მისი შვილი ცნობადი სახეა, მისი დაკავება საჩვენებელი დასჯაა.

"დაახლოებით 19:00 საათისთვის მოვიდნენ. იყო ზარი კარებზე, რომელიც თვითონ ანდრომ გააღო და პოლიციის წარმომადგენლები დახვდნენ. შემოვიდნენ სახლში. გვითხრეს, რომ ნერვიულობა არ იყო საჭირო. შევედით ოთახში და გვითხრეს, რომ ანდროს ბრალი ედებოდა ჯგუფური ძალადობის მუხლით. შეადგინეს დაკავების აქტი. ანდროს წარუდგინეს ბრალეულობა. წარადგინეს სასამართლოს განჩინება. ძალიან დიდხანს იყო საუბარი ანდროსა და პოლიციელებს შორის. ასეთი კითხვები იყო: აქციებზე მისი ყოფნა რა მიზნებს ემსახურება, მოსწონს თუ არა, რომ პოლიციელების წინააღმდეგ გამოყენებულია სხვადასხვა საშუალება, ფოიერვერკებსა და ლაზერებზე იყო საუბარი, ანდრო პასუხობდა ჩვეულებრივად. დაძაბულობის მომენტი აბსოლუტურად არ იყო. ბრალეულობის წარდგენის შემდეგ მას დაადეს ხელბორკილები და წაიყვანეს. ისინი დიდხანს იყვნენ აქ და მე როგორც მივხვდი, ტელევიზიების მოსვლას ელოდებოდნენ, რომ დაეფიქსირებინათ ანდროს დაკავება. მე ჩავედი და კარი გავუღე ოპერატორს, ამოვიყვანე და რომ ვკითხე, ვინ იყო, იმედის ოპერატორი ვარო.

რა თქმა უნდა, აქციაზე ანდროს იქ დგომა პრობლემაა მაგათთვის. რადგან ანდრო ცნობადი სახეა, უნდა დაისაჯოს, ასე მიიჩნევენ, საჩვენებელი დასჯის მომენტია.

მე ყოველთვის ამაყი ვარ ჩემი შვილით, რაც არ უნდა გააკეთოს. ცუდს ის არასდროს გააკეთებს, ამაში დარწმუნებული ვარ. მე ამაყი ვარ ანდროთი, ის აკეთებს იმას, რისიც სჯერა. სჯერა სამართლიანობის, ყოველთვის სამართლიანობის მომხრე იყო.

გაბედავს თუ არა ეს რეჟიმი მის ციხეში გაშვებას? ყველაფერია მათგან მოსალოდნელი. როდესაც შემოვიდნენ, დაძაბულობა არ შექმნილა. რა თქმა უნდა, ყველა ნერვიულობდა, იქ ვიყავი, მაგრამ მათი ქცევიდან დაძაბულობა არ ყოფილა. კორექტულ ფარგლებში იყვნენ", — განაცხადა ანდრო ჭიჭინაძის მამამ, ოთარ ჭიჭინაძემ. (ტექსტს ინტერპრესნიუსი ავრცელებს).

მსახიობი ანდრო ჭიჭინაძე 5 დეკემბერს დააკავეს. ის აქტიური მოქალაქეა და აქტიურად მონაწილეობდა ნოემბრის საპროტესტო აქციებში. ანდრო ჭიჭინაძეს ბრალად ედება, მიმდინარე აქციების ფარგლებში, ჯგუფური ძალადობის ორგანიზება, ხელმძღვანელობა ან მასში მონაწილეობა და ძალადობრივი ქმედებისაკენ საჯაროდ მოწოდება.

შსს-ს ცნობით, დანაშაული 9 წლამდე ვადით თავისუფლების აღკვეთას ითვალისწინებს.

4 დეკემბერს, ON.ge-სან საუბრისას ანდრო ჭიჭინაძემ განაცხადა, რომ "ოცნების" ხელისუფლება აბსოლუტურად არალეგიტიმურია და მაქსიმალურად უნდა შევუშალოთ ხელი, რომ "ერთხელ და სამუდამოდ ვუთხრათ, რომ ჩვენ არ შევეგუებით იმას, რა პოლიტიკასაც დღეს ისინი აწარმოებენ".

"მე ვდგავარ ჩემს მეგობრებთან ერთად ევროპული მომავლისთვის და მგონია, რომ აუცილებელია, დღეს ყველა სფერო გაიფიცოს, იმისთვის, რომ ევროპულ მომავალს არ შეექმნას საფრთხე. აუცილებელია, რომ ამ მთავრობას ყველანაირად შევუშალოთ ხელი და გაფიცვა ალბათ ერთ-ერთი ყველაზე მნიშვნელოვანი ხერხია ამისთვის და ყველაფერი უნდა გავაკეთოთ იმისთვის, რომ მთავრობას, რომელიც არის აბსოლუტურად არალეგიტიმური, მაქსიმალურად შევუშალოთ ხელი და ერთხელ და სამუდამოდ ვუთხრათ, რომ ჩვენ არ შევეგუებით იმას, რა პოლიტიკასაც დღეს ისინი აწარმოებენ", — განაცხადა ანდრო ჭიჭინაძემ On.ge-სთან.