მოსამართლეთა კოლეგიამ ერთობლივი გადაწყვეტილება მიიღო, რომლის მიხედვითაც, 7 ნოემბრის საქმეზე ბრალდებულების, დავით კეზერაშვილისა და ზურაბ ადეიშვილის მიმართ დაუსწრებლად შეფარდებული აღკვეთის ღონისძიება — პატიმრობა გადაისინჯა და ძალაში დარჩა.

როგორც სახელმწიფო ბრალმდებლები განმარტავენ, საქმეზე ახალი გარემოებები არ არის გამოკვეთილი, რაც აღკვეთის შეცვლის საფუძველი იქნებოდა, შესაბამისად, პატიმრობა ძალაში უნდა დარჩენილიყო.

ამასთან, დაცვის მხარე არ მიემხრო ამ პოზიციას. როგორც ადვოკატი ბექა ბასილაია ამბობს, სისხლისსამართლებრივი დევნა ყველა პირის მიმართ პოლიტიკური მოტივითაა დაწყებული, რატომაც აღკვეთის ღონისძიება — პატიმრობა უნდა გაუქმებულიყო.

მოსამართლეთა კოლეგიის თავმჯდომარის, ნინო ელისაშვილის თქმით, აღკვეთის ღონისძიებების სახელით პატიმრობის გამოყენებას საფუძვლად დაედო ის რომ სასამართლოს აზრით, დღევანდელი მოცემულობით ის ფაქტობრივი და ფორმალური საფუძვლები არ შეცვლილა.

ბრალდების მხარის ერთი მოწმე, იმჟამინდელი ხელისუფლების დროს მცხეთა-მთიანეთის გუბერნატორი ვასილ მაღლაფერიძე, დღევანდელ სასამართლო პროცესზე დაიკითხა, ხოლო თავის მხრივ ამ თემაზე პრეზიდენტმა მიხეილ სააკაშვილმა საზოგადოებას მიმართა.

შეგახსენებთ, სახელმწიფო ბრალდება საქართველოს ექსპრეზიდენტს 2007 წლის 7 ნოემბერს, მომიტინგეთა მასობრივად დარბევას, ტელეკომპანია იმედში შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.

ამავე საქმეზე სააკაშვილთან ერთად ბრალდებულები ვანო მერაბიშვილი, დავით კეზერაშვილი, გიგი უგულავა და ზურაბ ადეიშვილი არიან.

ამასთან, სააკაშვილს ბრალი საქართველოს სისხლის სამართლის კოდექსის 333-ე მუხლის მესამე ნაწილი აქვს წარდგენილი, რაც გულისხმობს სამსახურებრივი უფლებამოსილების გადამეტებას, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია.

ბრალდება სასჯელის სახით და ზომად 5-დან 8 წლამდე ვადით თავისუფლების აღკვეთას ითვალისწინებს.