აშშ-ში ტრამპის მომავალი ადმინისტრაცია გეგმავს, რომ სისხლის სამართლის საერთაშორისო სასამართლოს (ICC) სადამსჯელო ქმედებები დაუწესოს ისრაელის ოფიციალური პირების დაკავების ორდერის გაცემის შესახებ მიღებული გადაწყვეტილების გამო, — ამის შესახებ ინფორმაციას ისრაელური გამოცემა ავრცელებს.

ტრამპის ადმინისტრაციის გეგმა ჰააგის სასამართლოს გაუქმებას ეხება და სასამართლოს მიერ მიღებულ გადაწყვეტილება ეხება ისრაელის პრემიერმინისტრის, ბენიამინ ნეთანიაჰუსა და თავდაცვის ყოფილი მინისტრის, იოავ გალანტის დაკავების ორდერის გაცემის შესახებ.

ტრამპის გუნდში გეგმავენ, რომ ინდივიდუალურ სანქციები დაუწესონ სასამართლოს მთავარ პროკურორს, კარიმ ხანსა და იმ მოსამართლეების მიმართ, ვინც ნეთანიაჰუს დაკავების ორდერი გასცეს.

21 ნოემბერს, ICC-ის გადაწყვეტილებას აშშ-ს რესპუბლიკელი კონგრესმენი და ტრამპის მომავალი მრჩეველი ეროვნული უსაფრთხოების საკითხებში, მაიკ უოლცი გამოეხმაურა და განაცხადა, რომ ჰააგის სასამართლო არ არის სანდო და ბრალდებების უსაფუძვლობა აშშ-მ უკვე დაამტკიცა.

"ჰააგის სისხლის სამართლის საერთაშორისო სასამართლო (ICC) არ არის სანდო და მისი ბრალდებების უსაფუძვლობა აშშ-მ დაამტკიცა. ისრაელი კანონიერად იცავს თავის მოსახლეობას და საზღვრებს გენოციდის ჩამდენი ტერორისტებისგან. იანვარში უნდა მოელოდეთ მკაცრ პასუხს ICC-ის და UN-ის ანტისემიტური მიკერძოებულობის მიმართ", — განაცხადა უოლცმა.

შეგახსენებთ, რომ ჰააგის სისხლის სამართლის სასამართლომ ღაზაში კაცობრიობის წინაშე ჩადენილი ომის დანაშაულების ბრალდებით, ისრაელის პრემიერმინისტრის, ბენიამინ ნეთანიაჰუს, თავდაცვის ყოფილი მინისტრის იოავ გალანტისა და ჰამასის ერთ-ერთი ლიდერის დაკავების ორდერი გასცა.

დღეს, 22 ნოემბერს, იტალიამ და ნიდერლანდებმა გამოაცხადეს, რომ დაემორჩილებიან სასამართლოს მიერ გაცემულ დაკავების ორდერს და თუ ისრაელის მაღალჩინოსნები მათ ტერიტორიაზე შევლენ, დააკავებენ.