დონალდ ტრამპმა შესაძლოა მოუწოდოს ევროპულ და ბრიტანულ ჯარებს რუსეთისა და უკრაინის არმიებს შორის 800 მილის ბუფერული ზონა გააკონტროლონ, რაც ორ ქვეყანას შორის ომის გაყინვის გეგმის ნაწილად განიხილება. ინფორმაციას ამის შესახებ ტელეგრაფი ავრცელებს.

გამოცემის მიხედვით, გეგმის დეტალები მას შემდეგ დაზუსტდა, რაც ვოლოდიმირ ზელენსკიმ მკაფიოდ განაცხადა, რომ რუსეთის დამშვიდებით მშვიდობის დამყარების ნებისმიერი მცდელობა ევროპისთვის თვითმკვლელობას ნიშნავდა

რუსეთის პრეზიდენტმა ვლადიმერ პუტინმა დონალდ ტრამპს არჩევნებში გამარჯვება მიულოცა და თქვა, რომ მოსკოვი მზადაა ესაუბროს "მამაც" ლიდერს უკრაინის ომის მოგვარების საკითხზე.

გამოცემის მიხედვით, არჩეული პრეზიდენტის გეგმა, რომელიც ტრამპის სამმა თანამშრომელმა გამოაქვეყნა, ითვალისწინებს, რომ ამჟამინდელი ფრონტის ხაზი გაყინული კონფლიქტის ზონად იქცეს და უკრაინა დათანხმდეს, დაივიწყოს თავისი ამბიცია მინიმუმ 20 წლით ნატოში გაწევრიანებასთან დაკავშირებით, სანაცვლოდ კი შეერთებული შტატები უკრაინას იარაღით მოამარაგებს, რათა რუსეთი ომის თავიდან დაწყებას შეაჩეროს.

"ჩვენ არ ვაგზავნით ამერიკელ მამაკაცებსა და ქალებს უკრაინაში მშვიდობის დასამყარებლად. ამაში ჩვენ არ გადავიხდით. აიძულეთ პოლონელები, გერმანელები, ბრიტანელები და ფრანგები გააკეთონ ეს" — განაცხადა ტრამპის გუნდის ანონიმურმა წევრმა.

სოჭში ვალდაის სადისკუსიო კლუბში სიტყვით გამოსვლისას, ვლადიმერ პუტინმა აშშ-თან ურთიერთობების აღდგენის სურვილი გამოთქვა და განაცხადა, რომ ბურთი ახლა ვაშინგტონის მოედანზეა.