ერთი მოსამართლის გადაწყვეტილებამ სისტემა დილემის წინაშე დააყენა: იმ შემთხვევაში თუ სააპელაციო სასამართლო თეთრიწყაროს სასამართლოს მოსამართლის ვლადიმერ ხუჭუას გადაწყვეტილებას ძალაში დატოვებს, საპარლამენტო არჩევნების შედეგები კითხვის ნიშნის ქვეშ დადგება.

სასამართლოს გუშაგის დამფუძნებელი ნაზი ჯანეზაშვილი ამბობს, რომ თეთრიწყაროს რაიონული სასამართლოს გადაწყვეტილება, საქართველოს პოლიტიკური და სამართლებრივი ცხოვრებისთვის ისტორიულია.

"სამართლებრივი და პოლიტიკური თვალსაზრისით, შეიძლება ითქვას, რომ ვლადიმერ ხუჭუამ ისტორიული გადაწყვეტილება მიიღო. ამ გადაწყვეტილებით გამოჩნდა რამდენად დიდი როლი აქვს ერთ სამართლიან მოსამართლესაც კი ქვეყანაში. საბოლოო ჯამში ყველაზე მთავარი არის ის, რომ საარჩევნო პროცესთან დაკავშირებით, რომელიც ეხებოდა ფარულობის პროცესის დარღვევას მოსამართლემ მიიღო სამართლიანი და სწორი გადაწყვეტილება“, — ­­­ ამბობს ნაზი ჯანეზაშვილი.

სასამართლოს გუშაგის ხელმძღვანელი აცხადებს, მოსამართლის ვალდებულება იყო მიეღო სწორი გადაწყვეტილება და თავის მხრივ, საზოგადოებამ უნდა წაახალისოს და მხარი დაუჭიროს სამართლიან გადაწყვეტილებას.

„სწორ გადაწყვეტილებას როდესაც იღებს მოსამართლე, ბუნებრივია, რომ საჭიროებს საზოგადოების მხარდაჭერას, სწორ რეაგირებას, მაგრამ პირველ რიგში უნდა ვთქვათ, რომ ეს არის მისი ვალდებულება. ჩვენს ქვეყანაში ის არის პრობლემა, რომ მოსამართლეები არ ასრულებენ ამ ვალდებულებას, ამიტომაც ვართ ასეთ მძიმე მდგომარეობაში. ის კამპანია, რომელიც დაიწყო ხელისუფლების, პროპაგანდისტული მედიის მხრიდან, ბუნებრივია, კიდევ ერთხელ ხაზს უსვამს, რომ ხელისუფლებისთვის ეს იყო სრულიად მოულოდნელი“, — ამბობს ნაზი ჯანეზაშვილი.

გადაწყვეტილება სააპელაციო სასამართლოში ერთჯერადად საჩივრდება, რაც იმას ნიშნავს, რომ ამით სრულდება პროცესი და სასამართლოს გადაწყვეტილება ძალაში შედის. ყველაფერი დამოკიდებულია, რას იტყვის სააპელაციო სასამართლო.

მმართველ პარტიაში აცხადებენ, რომ მოსამართლე ხუჭუას გადაწყვეტილება პოლიტიკურად იყო მოტივირებული, რადგან, მათი თქმით, მისი ცოლი, მწერალი ელზა გურგენიძე, ოპოზიციის მხარდამჭერია.

• ეს იყო პოლიტიკური გადაწყვეტილება, დავალებით გაკეთებული — კალაძე მოსამართლე ხუჭუას გადაწყვეტილებაზე

ნაზი ჯანეზაშვილი განმარტავს, რომ ხელისუფლების წარმომადგენლების განცხადებები მოწმობს, რა გავლენები აქვს ხელისუფლებას სასამართლოზე და იმის მიუხედავად რა გადაწყვეტილებას მიიღებს სააპელაციო სასამართლო, მოსამართლე ვლადიმერ ხუჭუამ შექმნა მნიშვნელოვანი მტკიცებულება, რომ ეს არჩევნები არ იყო სამართლიანი და რომ კონსტიტუციური უფლება ხმის ფარულად მიცემასთან დაკავშირებით, დარღვეულია.

"ხელისუფლების წარმომადგენლების განცხადებები მოწმობს, რა გავლენები აქვს ხელისუფლებას სასამართლოზე, თავისი განცხადებებით აღიარებენ ამას. ერთი მოსამართლის გადაწყვეტილებასაც კი აქვს თავისი სამართლებრივი შედეგები, ძალა და მნიშვნელობა, ამდენად საკითხის მნიშვნელობის დაკნინება შეუძლებელია, იმიტომ რომ აწყობს თუ არა ეს ვინმეს, გადაწყვეტილება მიღებულია. რაც არ უნდა მოხდეს სააპელაციო სასამართლოში, თუნდაც შეიცვალოს ეს გადაწყვეტილება, ძალიან კარგია, რომ საქართველოს რეალობაში ერთმა მოსამართლემ მაინც საარჩევნო საქმეებზე თქვა თავისი სათქმელი. ეს გვაჩვენებს, რამდენად მნიშვნელოვანია თავისუფალი სასამართლო და როგორ შეუძლია ერთ დამოუკიდებელ გადაწყვეტილებას აბსოლუტურად შეცვალოს ყველაფერი", — ამბობს ნაზი ჯანეზაშვილი.

ნაზი ჯანეზაშვილისთვის კითხვებს აჩენს ის ფაქტი, რომ არჩევნების ფარულობის დარღვევასთან დაკავშირებული საქმეების სააპელაციო განხილვის განრიგი მოულოდნელად შეიცვალა და თბილისისა და ქუთაისის სააპელაციო სასამართლოში შესული ყველა საჩივარი ერთ საქმედ გაერთიანდა. ჯანეზაშვილის განმარტებით, სასამართლოს ამ ყველაფრის გაერთიანება პროცესუალურად შეეძლო, თუმცა მსგავსი გადაწყვეტილებები სასამართლოს საეჭვო რეპუტაციის ფონზე სადავოა.

გუშინ თეთრიწყაროს სასამართლომ ხმის ფარულობის დარღვევა დაადასტურა და მოსამართლე ვლადიმერ ხუჭუამ საიას სარჩელი დააკმაყოფილა. საია ითხოვდა შედეგების გაბათილებას იმ უბნებზე, სადაც ხმის მიცემა ელექტრონული ტექნოლოგიებით ტარდებოდა.

საქართველოს ახალგაზრდა იურისტთა ასოციაციამ 29 ოქტომბერს საოლქო საარჩევნო კომისიებში წარადგინა საჩივრები, რომლითაც ითხოვს შესაბამის ოლქებში შემავალი ყველა იმ უბნის (2263) შედეგების ბათილად ცნობას, სადაც არჩევნები ტექნოლოგიების გამოყენებით ჩატარდა.

საიას განცხადებით, მათ მიერ წარდგენილი საჩივრების დაკმაყოფილება გამოიწვევს ხელახალი არჩევნების ჩატარებას, რადგან ტექნოლოგიური უბნების შედეგების ბათილობა არსებით გავლენას ახდენს არჩევნების შედეგზე.

საია დავობს, რომ კენჭისყრის დღეს მასობრივად დაირღვა ამომრჩევლის ხმის ფარულობის პრინციპი, რაც არღვევს საქართველოს კონსტიტუციით გარანტირებულ საარჩევნო უფლებას.