როგორც ამ შემთხვევაში მოუწია ხელისუფლებას ჩვენი სიმართლის აღიარება, ასევე მოუწევს არჩევნების შედეგების აღიარება, — ასე გამოეხმაურა აირჩიე ევროპის ერთ-ერთი დამფუძნებელი, ხათუნა ლაგაზიძე ინტერპრესნიუსთან პრემიერ-მინისტრის განცხადებას, სადაც კობახიძე მიზანშეწონილად მიიჩნევს საერთაშორისო გამჭვირვალობას და სხვა ორგანიზაციებს, რომელთაც საარჩევნო მიზნის მქონე სუბიექტის სტატუსი მიენიჭათ, ეს სტატუსი მოეხსნათ.

ხათუნა ლაგაზიძის თქმით, ეს წინ გადადგმული ნაბიჯია ხელისუფლების ცვლილებისთვის.

"მთავარი არის შედეგი. შედეგი არის ის, რომ როგორც ახლა მოუწია საქართველოს ხელისუფლებას ჩვენი სიმართლის აღიარება, ასევე მოუწევს არჩევნების შედეგების აღიარება. ეს არის ძალიან მნიშვნელოვანი წინ გადადგმული ნაბიჯი ხელისუფლების ცვლილებისკენ საქართველოს საზოგადოების აზრის, განწყობების და ნების შესაბამისად," — განაცხადა ლაგაზიძემ.

პრემიერის გადაწყვეტილებას საერთაშორისო გამჭვირვალობა საქართველოს აღმასრულებელი დირექტორი, ეკა გიგაური ტვ პირველზე გამოეხმაურა. მისი თქმით, ბრძოლას ყოველთვის აქვს აზრი.

"უნდა დაველოდოთ, რას გააკეთებს ანტიკორუფციული ბიურო. ვფიქრობ, მიხვდნენ, რომ აბსოლუტურად აბსურდული გადაწყვეტილება მიიღო ანტიკორუფციულმა ბიურომ, არანაირი საფუძველია არ ჰქონდა და გაუჭირდებოდათ ახსნა. ეს უკან დახევაა, თუმცა, კიდევ ერთხელ ვნახოთ, რას იზამს ბიურო.

მთავარია, ვიცოდეთ, რომ ბრძოლას ყოველთვის აქვს აზრი და ყველა მოქალაქემ უნდა იცოდეს, ჩვენი ქვეყნისთვის ბრძოლა მარტივი არაა, მაგრამ თუ ვიქნებით მოტივირებულები და სწორ გადაწყვეტილებას მივიღებთ, შედეგი ექნება. ვნახოთ, რას იტყვის ბატონი რაჟდენი", — განაცხადა გიგაურმა.

შეგახსენებთ, რომ ცოტა ხნის წინ საქართველოს მთავრობის გვერდზე გამოქვეყნდა ირაკლი კობახიძის განცხადება, სადაც პრემიერი აცხადებს, რომ მიზანშეწონილად მიაჩნია, საერთაშორისო გამჭვირვალობას და სხვა ორგანიზაციებს, რომელთაც საარჩევნო მიზნის მქონე სუბიექტის სტატუსი მიენიჭათ, ეს სტატუსი მოეხსნათ.

24 სექტემბერს ანტიკორუფციული ბიუროს ხელმძღვანელმა რაჟდენ კუპრაშვილმა განაცხადა, რომ "განცხადებული საარჩევნო მიზნის მქონე სუბიექტებად" მიიჩნევს ორ არასამთავრობო ორგანიზაციას: საერთაშორისო გამჭვირვალობა საქართველოს და აირჩიე ევროპას.