ლიტერატურული კონკურსი "ილია თანამედროვე პოეზიაში" 12 სექტემბერს გაიმართა და ჟიურის სპეციალური დიპლომი საკონკურსო თემის ორიგინალური გააზრებისთვის გაგა გოგსაძეს გადაეცა.

მან დაჯილდოებისას დამსწრე სტუმრებს სიტყვით მიმართა და აღნიშნა, რომ საქართველოსთვის ისეთი ფატალური შეცდომა, როგორი რუსული კანონის მიღებაა ქვეყანას გეორგიევსკის ტრაქტატის მიღების შემდეგ არ დაუშვია.

"მძიმე დროება უდგას საქართველოს. გეორგიევსკის ტრაქტატის შემდეგ არ ყოფილა არაფერი ისეთი ფატალური ჩვენი ქვეყნისთვის, როგორც რუსული კანონი და მისი მიღებაა. ხშირად მესმის, რომ ხელოვნება უნდა გავმიჯნოთ პოლიტიკისგან, არა ბატონებო! სრულიად არაფერია ხელოვანი და ხელოვნება პროტესტის გარეშე, როდესაც საქმე სამშობლოს და მის თავისუფლებას ეხება. მავანნი, როდესაც ძალიან უნდათ, სპორტს და პოლიტიკას ადუღაბებენ, ძალიან ოსტატურად და ეს ჩვენ რამდენიმე დღის წინადაც ვნახეთ.

ყველაზე ჯოჯოხეთურ გაფიქრებაშიც კი მზარავს, რომ ოდესმე შეიძლება რუსი პოეტი გავხდე და სწორედ ამიტომ, ჩვენ ყველანი 26 ოქტომბერს უნდა მოვიქცეთ ისე, რომ ერთმანეთს მივულოცოთ დიდებული დღე! დღე, როდესაც საქართველოს ილიას გზას ვერ წაართმევენ!" — თქვა გაგა გოგსაძემ.