ბენზინგასამართ სადგურზე სავარაუდო ავტოსაგზაო შემთხვევისა და ძალადობის საქმეზე შინაგან საქმეთა სამინისტრომ გამოძიება დაიწყო. შემთხვევის ამსახველი ვიდეო სოციალური ქსელით გავრცელდა.

12 ივლისით დათარიღებულ ვიდეოში, რომელიც ფეისბუკით გავრცელდა, ჩანს, რომ ბენზინგასამართი სადგურიდან უკუმიმართულებით გამომავალი მანქანა მეეზოვეს უახლოვდება, რის შემდეგაც იწყება შელაპარაკება და ფიზიკური შეურაცხყოფა. ამავე კადრებში ჩანს, რომ ინციდენტიდან რამდენიმე წამში ადგილზე მივიდნენ პოლიციის თანამშრომლები, შემდეგ კი მალევე გამობრუნდნენ უკან.

ვიდეოს გამავრცელებელი კადრებს შემდეგი წარწერით აქვეყნებს: "ადამიანს მანქანით ეტაკება და შემდეგ ცემს! რატომ არ რეაგირებს პოლიცია? ვინ არის მძღოლი?"

შინაგან საქმეთა სამინისტროში On.ge-ს უთხრეს, რომ საქმეს სისხლის სამართლის კოდექსის 276 მუხლის პირველი ნაწილითა (ტრანსპორტის მოძრაობის უსაფრთხოების ან ექსპლუატაციის წესის დარღვევა) და 126 მუხლებით (ძალადობა) იძიებს.