"ერთი სერიალი მოუღებს ყველას ბოლოს", — ამ სიტყვებით იწყებს ძალაუფლების ბეჭდების მეორე სეზონის რეიტინგის შეფასებას ბრიტანული ვებგამოცემა Joe. სტატიის ავტორი ვარაუდობს, რომ Amazon-ის გახმაურებული სერიალი რეიტინგის კლების გამო შეიძლება დაიხუროს. ამავე აზრს იზიარებს ინტერნეტმომხმარებელთა ნაწილიც.

რამდენიმე დღის წინ, ტელეკომპანია Samba-მ გამოაქვეყნა მონაცემები, რომლის მიხედვითაც ძალაუფლების ბეჭდების მეორე სეზონს პრემიერიდან პირველ ოთხ დღეში 902 ათასმა მომხმარებელმა უყურა. ეს იმის ფონზე, როდესაც სერიალის პირველ სეზონს პრემიერიდან სამი დღის თავზე 1,8 მილიონი მაყურებელი ჰყავდა. რამ გამოიწვია მაღალბიუჯეტიანი სერიალის რეიტინგის განახევრება, ამაზე მხოლოდ ვარაუდით შეგვიძლია ვისაუბროთ. თუმცა, ძალაუფლების ბეჭდებს პირველივე სეზონიდან არაერთგვაროვანი გამოხმაურება ჰქონდა: მაყურებელთა ნაწილი მიიჩნევს, რომ ტოლკინის წიგნების ამ მორიგ ეკრანიზაციაში ბევრი უზუსტობაა.

თავად ამაზონმა კი მონაცემები სულ ახლახან გამოაქვეყნა. კომპანიის ცნობით, ძალაუფლების ბეჭდების მეორე სეზონის პირველმა ოთხმა ეპიზოდმა 11 დღის განმავლობაში 40 მილიონამდე ნახვა მოაგროვა. თუმცა, აღნიშნულ სტატისტიკას კონტექსტი აკლია, რადგან ამაზონს არ დაუზუსტებია, რას აღნიშნავს ეს რიცხვი — ის შეიძლება იყოს იმ მაყურებლების რაოდენობა, ვინც სერიალი, უბრალოდ, ჩართო. ამასთან, 2022 წელს ამაზონმა განაცხადა, რომ ძალაუფლების ბეჭდების პირველ სეზონს პრემიერის დღესვე 25 მილიონამდე ნახვა ჰქონდა, ამდენად, სერიალის რეიტინგის მკვეთრ კლებას ეს მაჩვენებლებიც უსვამს ხაზს.

ამდენად, გასაკვირი არაა, რომ Forbes-იც სერიალს დახურვას უწინასწარმეტყველებს. მე-3 სეზონი ალბათ არ გაუქმდება, მაგრამ დაპირებული ხუთი სეზონი შეიძლება ვერ მივიღოთო, შენიშნავს ავტორი.

"ჯეფ ბეზოსის [ამაზონის ხელმძღვანელი] ადგილას, ახალი რეჟისორებისა და სცენარისტების ძებნას დავიწყებდი", — ვკითხულობთ ფორბსის სტატიაში, — "თუმცა, უკვე ძალიან გვიანია. ისეთი უცნაური გადაწყვეტილებები იქნა მიღებული, რომ საქმის შემოტრიალება შეუძლებელია.

"ჩემზე რომ იყოს დამოკიდებული, მეორე სეზონის შემდეგ სერიალს დავხურავდი და ახალ პროექტს დავიწყებდი უფრო გამოცდილი რეჟისორებით, საუკეთესო სცენარისტებითა და ტოლკინის ექსპერტებით, რომლებიც ამბის ერთგულები იქნებიან. რასაკვირველია, ადაპტაციაში ცვლილებებიც უნდა იყოს, მაგრამ საქმეში დაოსტატებულმა რეჟისორებმა და სცენარისტებმა, რომლებიც ექსპერტების აზრს იღებენ და სურთ, პირველწყაროს ერთგულები დარჩნენ, მეორე ეპოქაზე ჩამთრევი სერიალი უნდა შექმნან და არა ეს უღიმღამო, პრიმიტიული ფანფიკი".

ფორბსის სტატიაში ასევე აღნიშნულია, რომ რეიტინგის კლება განსაკუთრებით დიდ დარტყმას მაღალბიუჯეტიან პროექტებს აყენებს. ძალაუფლების ბეჭდები კი ყველა დროის ყველაზე მაღალბიუჯეტიან სერიალად მიიჩნევა, რომლის ხუთი სეზონისთვის $1 მილიარდია გამოყოფილი.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…