ქართველმა მომღერალმა ბარბარა სამხარაძემ ევროვიზიაზე მონაწილეობის სურვილი კიდევ ერთხელ გამოთქვა. მუსიკოსი საერთაშორისო კონკურსზე ჩვენი ქვეყნის წარსადგენად 2019 წელსაც იბრძოდა ტელეპროექტ საქართველოს ვარსკვლავში, სადაც საბოლოოდ მეორე ადგილი დაიკავა.

"ძალიან მინდა, რომ ქვეყანა წარვადგინო [ევროვიზიაზე], იმიტომ, რომ ეს არ არის მხოლოდ სიმღერის კონკურსი, იქ კიდევ ბევრი სხვა რაღაც ფასდება კარგი სიმღერისა და შესრულების გარდა", — ამბობს სამხარაძე ინტერნეტგადაცემაში თათიას გმირები, — "ვფიქრობ, რომ იმედს არ გავუცრუებ არავის. მე ამას ვგრძნობ".

საქართველოს ვარსკვლავში, რომლითაც 2020 წლის ევროვიზიაზე საქართველოს წარმომადგენლად თორნიკე ყიფიანი შეირჩა, ბარბარას გამარჯვებამდე ხმების, დაახლოებით, 3% დააკლდა. ეს შედეგი კი, როგორც მუსიკოსი ამბობს, მისთვის საკმაოდ მძიმედ გადასატანი აღმოჩნდა.

"მეგონა, რომ რაღაც არ ვქენი სწორად. ჩემს თავს ვაბრალებდი ამ ყველაფერს. თვითგვემა დამეწყო და ამან ძალიან ცუდ მდგომარეობამდე მიმიყვანა", — იხსენებს სამხარაძე.

ფოტო: საქართველოს ვარსკვლავი / საზოგადოებრივი მაუწყებელი

ბარბარა სამხარაძე დიდ სცენაზე 14 წლის ასაკში დადგა, როცა ტელეპროექტ ნიჭიერში გამოჩნდა და კონკურსის გამარჯვებული გახდა. 2023 წელს ბარბარამ თავისი პირველი საავტორო სიმღერა Ocean Side სინგლად გამოუშვა Barbara K-ის სახელით. სიმღერა ქართულ ტიკტოკზე მალევე იქცა ტრენდულ "საუნდად", იუთუბზე კი მის ვიდეოს ამ დროისთვის 3 მილიონამდე ნახვა აქვს.

აღსანიშნავია, რომ ევროვიზიის ქართველი ფანების დიდი ნაწილი წლებია, ბარბარას კონკურსზე მონაწილეობას ითხოვს. წელს ჩვენ მიერ ჩატარებულ გამოკითხვაში, ვის უნდა წარედგინა საქართველო ევროვიზია 2025-ზე, Nini Iris-ის (ნინი ბრეგვაძის) შემდეგ ყველაზე დიდი მხარდაჭერა სწორედ სამხარაძეს ჰქონდა.

"ბევრს ეგონა, რომ თავად ვთქვი უარი წლევანდელი ევროვიზიის შიდაშესარჩევ კონკურსზე. მე კი არც ვიცოდი, რა შესარჩევი ტური იყო ან როდის უნდა გამეგზავნა [სიმღერა]. ფაქტობრივად, 'შიგნით' თუ არ გაქვს კონტაქტი, ეს ინფორმაცია გარეთ არავის გამოაქვს", — ამბობს ბარბარა თათიას გმირებში.

პირველმა არხმა, რომელიც ევროვიზიაზე საქართველოს წარმომადგენლის შერჩევაზეა პასუხისმგებელი, წელს არჩევანი მარიამ შენგელიაზე და ქეთი გაბისიანის სიმღერაზე Freedom ("თავისუფლება") შეაჩერა. საზმაუს მტკიცებით, სიმღერა "საერთაშორისო კონკურსზე ზუსტად წარმოაჩენდა ჩვენი ქვეყნის კულტურულ იდენტობას". შენგელიამ ევროვიზიის ნახევარფინალში ბოლოდან მეორე, მე-15 ადგილი დაიკავა და კონკურსს გამოეთიშა.

ჯერჯერობით უცნობია, მიიღებს თუ არა საქართველო მონაწილეობას 2026 წლის ევროვიზიაზე, რომელსაც ავსტრია უმასპინძლებს. მანამდე, 13 დეკემბერს, თბილისში საბავშვო ევროვიზიის სიმღერის კონკურსი გაიმართება.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...