9 აგვისტოს ოფიციალური ვიზიტით საქართველოში, სენატორი ჯინ შაჰინი და კონგრესმენი მაიკ ტერნერი იმყოფებოდნენ. ამერიკელ პოლიტიკოსებს, პირველად პრეზიდენტმა სალომე ზურაბიშვილმა ორბელიანების სასახლეში უმასპინძლა. შეხვედრის ამსახველი ფოტო პრეზიდენტმა სოციალურ ქსელ X—შიც გამოაქვეყნა.

პრეზიდენტის თქმით, მათ ორმხრივი ურთიერთობები, საქართველოს ევროატლანტიკური ინტეგრაცია, მოახლოებული არჩევნები, რუსული ოკუპაცია, ჰიბრიდული ომი და შავი ზღვის უსაფრთხოება განიხილეს.

"მათი ვიზიტი საქართველოსადმი ამერიკის შეერთებული შტატების მტკიცე მხარდაჭერის კიდევ ერთი დასტურია", — აღნიშნა ზურაბიშვილმა.

მოგვიანებით, ზურაბიშვილთან შეხვედრას გამოეხმაურა სენატორი ჯინ შაჰინიც.

"სასიამოვნოა, რომ ჩემი ვიზიტი საქართველოში პრეზიდენტ ზურაბიშვილთან შეხვედრით დავიწყე. მადლობელი ვარ ევროატლანტიკური მომავლისადმი მისი მტკიცე ერთგულებისთვის — ესაა ამბიცია, რომელსაც იზიარებს ქართველი ხალხის უმრავლესობა", — დაწერა ჯინ შაჰინმა სოციალურ ქსელ X-ში.

10 აგვისტოს, სენატორი და კონგრესმენი მთავრობის ადმინისტრაციაში საქართველოს პრემიერ-მინისტრს ირაკლი კობახიძეს შეხვდნენ, შეხვედრას ასევე ესწრებოდნენ ამერიკის სრულუფლებიანი ელჩი რობინ დანიგანი, საგარეო საქმეთა მინისტრი ილია დარჩიაშვილი და მთავრობის ადმინისტრაციის უფროსი ლევან ჟორჟოლიანი.

კობახიძე შეხვედრას სოციალურ ქსელ X-ში გამოეხმაურა:

"კიდევ ერთხელ აღვნიშნე საქართველოს მზადყოფნა ჩვენი ურთიერთობებისა და თანამშრომლობის განახლებისა და გადატვირთვისთვის, რათა გავაძლიეროთ ორმხრივი კავშირები და ხელი შევუწყოთ მეტ განვითარებას, კეთილდღეობას, მშვიდობასა და უსაფრთხოებას რეგიონში და მის ფარგლებს გარეთ". — თქვა პრემიერმა.

კომენტარი შეხვედრის შემდეგ გააკეთა სენატორმა ჯინ შაჰინმაც, მისი თქმით პრემიერი აშშ-სთან ორმხრივი ურთიერთობით დაინტერესებული არ არის.

"არ არის დაინტერესებული ან არ ჩანს, რომ დაინტერესებულია ამ ურთიერთობების გაგრძელებით" — თქვა სენატორმა შაჰინმა.

შეხვედრის შემდეგ განცხადება, კონგრესმენმა მაიკ ტერნერმაც გააკეთა და აღნიშნა, რომ პრემიერის განცხადებები მისთვისაც იმედგამაცრუებელი იყო.

"არ მიმაჩნია, რომ მისი განცხადება ზუსტად ასახევს ამერიკის პოზიციას ან საქართველოსა და ამერიკას შორის ურთიერთობებს", — განაცხადა კონგრესმენმა მაიკ ტერნერმა.

11 აგვისტოს, ცნობილი გახდა ისიც, რომ ჯ.შაჰინსა და კონგრესმენ მაიკ ტერნერს შეხვედრა ბიძინა ივანიშვილთანაც სურდათ, თუმცა ამაზე უარი მიიღეს.

"იმაზე დაყრდნობით, რაც ხალხისგან გვესმის, ნათელია, რომ ის ქვეყანაში ერთ-ერთი მთავარი გადაწყვეტილების მიმღებია. ამდენად, სამწუხაროა, რომ ისევ არ შეგვხვდა", — თქვა სენატორმა.

ირაკლი კობახიძის თქმით კი, ბიძინა ივანიშვილმა მკაფიოდ განუმარტა ამერიკელ პარტნიორებს, თუ რატომ არ შეხვდა მათ, ოღონდ თავად არ უთქვამს, ამის მიზეზი რა იყო.

"თუ რამდენად შეიძლება გახდეს ეს განმარტება საჯარო, ეს არის დამოკიდებული ბიძინა ივანიშვილზე, ეს დამოკიდებულია ჩვენს ამერიკელ პარტნიორებზე. თუ დადგება დღის წესრიგში ამის გასაჯაროება, შესაბამისი მხარეები მიიღებენ ამის გადაწყვეტილებას", — განაცხადა პრემიერმა.

ვიზიტის ბოლოს, ამერიკელი პოლიტიკოსები საოკუპაციო ხაზთანაც იმყოფებოდნენ.

"თექვსმეტი წელი გავიდა მას შემდეგ, რაც რუსეთი საქართველოში შემოიჭრა. რუსეთის მიერ საქართველოს ტერიტორიის ოცი პროცენტის მიმდინარე ოკუპაცია და ბორდერიზაცია დღემდე ძირს უთხრის საქართველოს სუვერენიტეტსა და ტერიტორიულ მთლიანობას და გავლენას ახდენს ქართველებზე. ოფიციალური ვიზიტის ფარგლებში სენატორი შაჰინი და კონგრესმენი ტერნერი ადმინისტრაციულ გამყოფ ხაზთან ჩავიდნენ. შეერთებული შტატები კვლავ მოუწოდებს რუსეთს, შეასრულოს 2008 წლის ცეცხლის შეწყვეტის შეთანხმებითა და გაეროს წესდებით ნაკისრი ვალდებულებები." — აშშ-ის საელჩო.