რუსმა სენატორმა და რუსეთის საბჭოს საგარეო საქმეთა ხელმძღვანელმა გრიგორი კარასინმა განაცხადა, რომ მოსკოვი წელს სტეფანაკერტში (ხანკენდიში) საკონსულოს გახსნის.

რუსული სახელმწიფო საინფორმაციო სააგენტო TASS იტყობინება, რომ კარასინმა ამის შესახებ ორშაბათს, აზერბაიჯანის პარლამენტის საერთაშორისო და საპარლამენტთაშორისო ურთიერთობების თავმჯდომარესთან, სამად სეიდოვთან შეხვედრისას თქვა.

"ვგეგმავთ ამისთვის მოსამზადებელი სამუშაოების დაწყებას უახლოეს მომავალში და თქვენი მხარდაჭერის იმედი გვაქვს”, — თქვა კარასინმა.

OC Media კომენტარს აზერბაიჯანის საგარეო საქმეთა სამინისტროდან ელის.

პოლიტიკურმა ანალიტიკოსმა რაუფ მირკადიროვმა კარასინის განცხადებებს აბსურდული უწოდა და OC Media-ს უთხრა, რომ სტეფანაკერტში რუსები არ ცხოვრობენ.

"ამ ქალაქში არცერთი რუსი არ ცხოვრობს და არ მგონია, რომ მომავალში იცხოვრებს რუსეთის ათასობით მოქალაქე", — თქვა მან.

მირკადიროვი ვარაუდობს, რომ აზერბაიჯანსა და რუსეთს, შესაძლოა, ჰქონდეთ "საიდუმლო შეთანხმებები" თურქეთთან ერთად, მთიან ყარაბაღში რუსეთის ყოფნის გასამყარებლად.

თურქეთის პრეზიდენტმა რეჯეფ თაიფ ერდოღანმა 2021 წელს გამოთქვა ინიციატივა თურქეთის საკონსულოს გახსნის შესახებ შუშაში (შუშში), მას შემდეგ, რაც ქალაქი აზერბაიჯანის კონტროლის ქვეშ მოექცა, მეორე მთიანი ყარაბაღის ომის დროს.

"თურქეთი გეგმავს უძველეს ქალაქ შუშაში საკონსულოს გახსნას რაც შეიძლება მალე. ამითი ჩვენი საქმიანობა რეგიონში უფრო სწრაფი და ეფექტიანი იქნება”, — განაცხადა მაშინ ერდოღანმა.

სტეფანაკერტი დაუსახლებელ ქალაქად რჩება მას შემდეგ, რაც, 2023 წლის სექტემბერში მთიანი ყარაბაღის სომეხი მოსახლეობა სომხეთში გაიქცა თავშესაფრის საძიებლად.

მაისის დასაწყისში, თურქეთის ელჩმა ბაქოში, კაჰიტ ბაღჯიმ აზერბაიჯანულ მედიას განუცხადა, რომ სტეფანაკერტი "მზად უნდა იყოს“, ვიდრე თურქეთი საკონსულოს გახსნის.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.