რა ხდება: პრეზიდენტმა რუსულ კანონს ვეტო დაადო და თქვა, რომ პარლამენტს დღესვე გადაუგზავნის.

  • "ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო, ეს კანონი უნდა გაუქმდეს", — თქვა სალომე ზურაბიშვილმა დღეს, ორბელიანების სასახლეში გამართულ ბრიფინგზე.

რა იქნება ამის შემდეგ: პრეზიდენტის ვეტო ფორმალურია.

მისი დაძლევა ქართულ ოცნებას არ გაუჭირდება. ამისთვის 76 ხმაა საჭირო, რუსულ კანონს კი უმრავლესობის 84-მა დეპუტატმა დაუჭირა მხარი.

ასევე, ნახეთ — ჯიმ ო'ბრაიენი: თუ ივანიშვილი ყველაფრის სათავეშია და ამ გზას გააგრძელებს, მაშინ ვფიქრობ, ეს [სანქციები] არის ის, რასაც განვიხილავთ

იურისტი ნიკა სიმონიშვილი ამბობს, რომ მომდევნო სასესიო დღეები პარლამენტში 28-31 მაისს არის, მანამდე კი იურიდიული კომიტეტის სხდომაზე უნდა განიხილონ პრეზიდენტის შენიშვნები.

  • "ანუ, ყველაზე ადრე კანონის მიღების კალენდარი ასეთი შეიძლება იყოს:
  • 20-27 მაისის ინტერვალში იურიდიულმა კომიტეტმა შენიშვნები შეიძლება განიხილოს;
  • 28-31 მაისის ინტერვალში პლენარულ სხდომაზე ვეტოს გადალახვა. ამის შემდეგ საკანონმდებლო პროცედურები, ფაქტობრივად, მთავრდება და კანონი საბოლოოდ მიღებულია", — წერს სიმონიშვილი ფეისბუქზე.

მისივე თქმით, თუ ვეტო გადაილახება, სამი დღის ვადაში ეგზავნება პრეზიდენტს და 5 დღე აქვს ხელმოსაწერად.

თუ ამ ვადაში ხელს არ მოაწერს, მისი ამოწურვიდან 5 დღეში პარლამენტის თავმჯდომარეს შეუძლია მოაწეროს ხელი და გამოაქვეყნოს.

  • "ეს ვეტოს გადალახვის ყველაზე მოკლევადიანი სცენარია, თუმცა კანონმდებლობა არ ადგენს მაქსიმალურ ვადებს და ეს, შეიძლება, გარკვეული პერიოდის შემდეგაც გააკეთოს ოცნებამ, მაგალითად, მომდევნო თვეში/თვეებში, რისი შესაძლებლობაც პროცედურულად არსებობს", — ამბობს ნიკა სიმონიშვილი.

ბოლო ხაზი: საქართველოს პარლამენტმა რუსული კანონი, მესამე მოსმენით, 14 მაისს მიიღო.

  • ამასთან, ცნობილი გახდა, რომ კანონში შეიტანეს ცვლილებები, რომლის მიხედვით, იურისტების განმარტებით, კანონი ეხება არამხოლოდ იურიდიულ, არამედ — ფიზიკურ პირებსაც.

ამ თემაზე ვრცლად: საია-ს თავმჯდომარე განმარტავს, რა შეცვალა ქართულმა ოცნებამ რუსულ კანონში