მოკლედ: პარლამენტში რუსული კანონის მისაღებად მესამე, საბოლოო მოსმენა დაიწყეს. პლენარულის დღის წესრიგის მიხედვით, პირველი ნაწილი პოლიტიკურ განცხადებებს ეთმობა, ამას კი მოჰყვება რუსული კანონის განხილვა და კენჭისყრა.

  • ქართული ოცნების საპარლამენტო უმრავლესობის დეპუტატები ერთმანეთს ტაშს უკრავენ სიტყვით გამოსვლის შემდეგ;
  • ხოლო ოპოზიციონერი დეპუტატების სიტყვით გამოსვლას მათგან რამდენჯერმე მოჰყვა ხმაური.
  • საპარლამენტო უმრავლესობის პოლიტიკური გამოსვლის გზავნილები გაჯერებულია ანტიდასავლური ნარატივებით.

უმრავლესობას სიტყვით მიმართა ანა წითლიძემაც, ოპოზიციონერმა დეპუტატმა ერთიანი ნაციონალური მოძრაობიდან.

ანა წითლიძე: "[...] უნდა გესმოდეთ ასი ათასობით საქართველოს მოქალაქის ხმა. თქვენ რომ ივანიშვილის მონები არ იყოთ,

  • როდის გინახავთ ამდენი სტუდენტი ქუჩაში?
  • როდის გინახავთ ამდენი გამოსული სკოლის მოსწავლე ქუჩაში?
  • როდის გინახავთ ამდენი პროფესორ-მასწავლებელი ქუჩაში?
  • როდის გინახავთ ასეთი ერთიანი, ასეთი შეკრული საქართველო, ევროპული მომავლისთვის ბრძოლაში?
  • დღეს არა რუსულ კანონს, უდრის — არა რუსულ რეჟიმს.

თქვენ ხართ ლეგიტიმაცია დაკარგული ხელისუფლება, თქვენ ხართ რეჟიმი, რომელიც

  • თვალში დამიზნებით ესვრის ახალგაზრდებს;
  • თქვენ ხართ ხელისუფლება, რომელმაც თმებით ათრიეთ ქალი და რომელ ქართველობაზე უნდა გველაპარაკოთ?
  • თქვენ ხართ ხელისუფლება, რომელიც ბავშვებს ურეკავთ, აშინებთ და აგინებთ;
  • თქვენ ხართ რეჟიმი, რომელიც სახლში უვარდებით ოპოზიციის ლიდერებს, სცემთ ახალგაზრდებს."

მესამე, საბოლოო მოსმენა ითვალისწინებს კანონპროექტის ტექნიკურ-რედაქციული შინაარსის განხილვას. ამ პროცესის შემდეგ პარლამენტის მესამე მოსმენით მხარდაჭერა კანონპროექტის მიღებას ნიშნავს და ის შემდეგ ხელმოსაწერად საქართველოს პრეზიდენტს გაეგზავნება. ცნობილია, რომ პრეზიდენტი რუსულ კანონს დაადებს ვეტოს, თუმცა, საპარლამენტო უმრავლესობას შეუძლია მისი დაძლევა.