მოკლედ: შინაგან საქმეთა სამინისტრო, რუსული კანონის გასაპროტესტებლად შეკრებილებს მოუწოდებს, არ დაუშვან საავტომობილო გზების პარალიზება, არ განახორციელონ კანონსაწინააღმდეგო ქმედებები და არ გააჟღერონ მოწოდებები, რომლებიც შესაძლოა, ძალადობრივი ქმედებების წინაპირობა გახდეს.

  • შესაბამისი განცხადება უწყებამ გაავრცელა.
  • "მოვუწოდებთ პოლიტიკური პარტიების ლიდერებს, აქციის ორგანიზატორებსა და თითოეულ მონაწილეს, პროტესტი გამოხატონ კანონით დადგენილ ფორმებში", — ვკითხულობთ შსს-ს განცხადებაში.

დეტალები: შსს წერს, რომ ვრცელდება ინფორმაცია, რომ პროტესტის მონაწილეები საკანონმდებლო ორგანოს შენობის შესასვლელებისა და გასასვლელების პიკეტირებას გეგმავენ.

  • ისინი მოუწოდებენ დემონსტრანტებს, პროტესტი გამოხატონ რუსთაველის გამზირზე, საკანონმდებლო ორგანოს წინ და უკანა შესასვლელთან: "კიდევ ერთხელ, აღვნიშნავთ, რომ შეკრებებისა და მანიფესტაციების შესახებ საქართველოს კანონის შესაბამისად, აკრძალულია ადმინისტრაციული შენობების შესასვლელების ბლოკირება და მათი საქმიანობის შეფერხება".

რა ხდება პარლამენტთან: საქართველოს პარლამენტის შენობასთან რუსული კანონის გასაპროტესტებლად ისევ იკრიბებიან მოქალაქეები.

  • დემონსტრანტები შეკრებილი არიან შენობის უკანა შესასვლელთანაც.
  • პარალელურად, საქართველოს პარლამენტის ეზოში სპეცრაზმისა და საპოლიციო ძალების მობილიზება ხდება.
  • საპოლიციო ძალები არიან გამაგრებული პარლამენტის უკანა შესასვლელთანაც.
  • ისევე, როგორც გუშინ და სხვა დღეებშიც, როდესაც პარლამენტთან პროტესტი მიმდინარეობს, საპოლიციო ძალებმა პარლამენტის შესასვლელები დღესაც ჩარაზეს.

გაიგე მეტი: პარლამენტის ეზოში სპეცრაზმისა და საპოლიციო ძალების მობილიზებაა, შენობის ირგვლივ კი მოქალაქეები აქციისთვის ემზადებიან