ჰილარი სვონკმა საკუთარი ვარსკვლავური დიდება 1999 წელს, ოსკარის მომტანი პერფორმანსის შემდეგ მიიღო, ფილმში Boys Don't Cry შესრულებული როლისთვის. ხუთი წლის შემდეგ კი მეორე ოსკარსაც დაეუფლა, ამჯერად კლინტ ისტვუდის ფილმისთვის Million Dollar Baby. სწორედ ამის შემდეგ შეწყვიტეს ჰოლივუდში მასზე საუბარი.

საინტერესოა, რა გახდა მიზეზი იმისა, რომ ჰოლივუდმა ორი ოსკარის მფლობელ მსახიობ ჰილარი სვონკს ზურგი შეაქცია?

ჰოლივუდური პრესა ამის რამდენიმე მიზეზს ასახელებს.

ძალიან სწრაფად მიიღო ორი ოსკარი

როგორც აღმოჩნდა, თუ მერილ სტრიპი არ ხარ, არ გაქვს უფლება ასე სწრაფად აიღო ორი ოსკარი, მიუხედავად იმისა, რამდენად კარგად ასრულებ როლს. როგორც აღმოჩნდა, ჰოლივუდში ეს არ უყვართ.

წერენ იმასაც, რომ მთავარი გაღიზიანება ჰილარის მეორე ოსკარმა განაპირობა, რადგან 2005 წელს მისი კონკურენტები ანეტ ბენინგი და ქეით უინსლეტი იყვნენ, რომლებსაც იმ პერიოდში ოსკარი არ ჰქონდათ მიღებული. (ბენინგს დღემდე არ აქვს ოსკარი).

ამბობენ, რომ მას უბრალოდ გაუმართლა

ჰოლივუდში ყველაფერი რომ გამართლებაზეა, ეს ახალი ფაქტი ნამდვილად არ არის. მიუხედავად იმისა, რომ ოსკარის მომტან ორივე ფილმში სვონკმა არაჩვეულებრივად ითამაშა, პრესა ხშირად აღნიშნავდა, რომ მას უბრალოდ გაუმართლა და მეტი არაფერი. ხშირად იხსენებენ მის ფილმოგრაფიასაც და წერდნენ, რომ The Next Karate Kid-ის მსახიობი როცა ხარ, ერთადერთი რის გამოც დოლბის (მაშინ კოდაკის) სცენაზე შეიძლება ახვიდე იღბალია.

ოსკარის შემდეგ შესრულებული როლები

სვონკს ძალიან უჭირს სათავისო როლების მოძებნა ჰოლივუდში, განსაკუთრებით ისეთების, რომლებიც მის პრესტიჟზე კარგად იმოქმედებს. მაგალითისთვის შეგვიძლია ავიღოთ ამელია ერჰარტზე გადაღებული ბიოგრაფიული ფილმი, Amelia, რომელიც გაქირავებაშიც ჩავარდა და სვონკმაც კრიტიკოსებისგან უარყოფითი გამოხმაურება მიიღო. მაშინ პრესა წერდა, რომ სვონკმა ოსკარის შემდეგ მოხვეჭილი დიდება ერთი როლით გაანადგურა. მაშინ კრიტიკას სვონკიც გამოეხმაურა:

"როცა მსახიობი ხარ, უნდა შეეგუო, რომ სულ ცაში ვერ იფრენ. ხანდახან დაეცემი კიდეც".

თვითონ შეაქცია ზურგი ჰოლივუდს

სხვა მსახიობების მსგავსად, ჰილარი სვონკს ბევრი განსხვავებული ინტერესი აქვს. ერთადერთი პრობლემა კი მის შემთხვევაში ის არის, რომ ყურადღების ცენტრში მხოლოდ ამ ინტერესების გამო ექცევა და არა მისი ახალი პროექტების გამო. პრესაში ხშირად წერენ მის ახალ-ახალ საქველმოქმედო საღამოებზე, იმაზე თუ როგორ ზრუნავს ბავშვებზე და ცხოველებზე, თუმცა მისი ახალი როლები თითქმის ყოველთვის ყურადღების მიღმა რჩება. მის გატაცებებს და ახალი კომპანიების სახედ ყოფნას კი იმას მიაწერენ, რომ მან თავად აქცია ზურგი ჰოლივუდს.

ნაკლები დრო ფილმებს, მეტი დრო ოჯახს

2015 წელს Huffington Post-თან ინტერვიუში მსახიობმა თქვა, რომ მას დრო კარიერაზე ზრუნვისთვის არ რჩება, რადგან ავადმყოფ მამას უვლის.

"რა ძალიანაც არ უნდა გინდოდეს კარიერაზე ზრუნვა და ფიქრი, ეს უკვე მეორეხარისხოვანი ხდება როცა სხვა ადამიანს სჭირდები, მით უმეტეს თუ ის შენი მამაა. ახლა ის ჩემთან ცხოვრობს და ვჭირდები ისე, როგორც არასდროს", თქვა მსახიობმა.

აქვს თუ არა მომავალი ტელევიზიაში?

ბევრი ვარსკვლავი, რომელიც ჰოლივუდმა მიივიწყა ტელევიზიაში გადაბარგდა. არიან ისეთები, რომლებიც ჰოლივუდის A კლასის ვარსკვლავები არიან, თუმცა ლტოლვა ტელევიზიის მიმართ უფრო და უფრო უმძაფრდებათ. ეს მოულოდნელი ნამდვილად არ არის, ახლა ხომ სერიალებს ოქრო ხანა აქვთ. შესაბამისად, მიუხედავად იმისა, რომ სვონკს სამომავლო გეგმებში რამდენიმე ფილმი უწერია, პრესა ყველაზე დიდ ინტერესს მაინც იმ სერიალის მისამართით იჩენს, რომელშიც ის მთავარ როლს შეასრულებს.