მოკლედ: დღეს, 16 აპრილს, საქართველოს პარლამენტში, "ლგბტ პროპაგანდის" ამკრძალავი კანონის სახალხო განხილვის 13-კაციანი საორგანიზაციო კომისია შეიქმნა.

• კომისიის შექმნის მიზნით, დადგენილების პროექტს მხარი დაუჭირა 77-მა დეპუტატმა, წინააღმდეგ ხმა მისცა ორმა.

რედაქციისგან: ოცნების რუსულ-უნგრული ვა-ბანკი: რეალურად, რა მიზანი დგას "ოჯახური ღირებულებების" დაცვის შირმის მიღმა

დეტალები: საორგანიზაციო კომისიის შემადგენლობაში აღარ იქნება ალეკო ელისაშვილი პარტია მოქალაქეების ლიდერი, რომელიც, თავდაპირველად, კომისიის წევრობის მსურველთა შორის იყო, თუმცა, მან საკუთარი კანდიდატურა გაიწვია.

On.ge დაინტერესდა რატომ თქვა უარი ალეკო ელისაშვილმა საორგანიზაციო კომისიის წევრობაზე.

• დეპუტატთან დაკავშირება ვერ მოვახერხეთ, თუმცა, ვესაუბრეთ პარტიის პრესსამსახურს:
• "არც უნდა ყოფილიყო კომისიაში, სურვილი არც ჰქონია თავიდან. ძალიან შემთხვევით მოხდა, რომ მსურველთა სიაში მისი გვარი იყო დაფიქსირებული, როგორც კი ეს გავიგეთ, შევეხმიანეთ [პარლამენტს] და ამოვაღებინეთ".

ასევე, საორგანიზაციო კომისიის შემადგენლობაში, პარლამენტის განათლების კომიტეტის თავმჯდომარის, გივი მიქანაძის ნაცვლად, ირაკლი შატაკიშვილი იქნება.

კომისიის შემადგენლობაში იქნებიან:

• შალვა პაპუაშვილი — საქართველოს პარლამენტის თავმჯდომარე;
• მამუკა მდინარაძე — საპარლამენტო უმრავლესობის ლიდერი, ფრაქცია ქართული ოცნების თავმჯდომარე;
• რატი იონათამაშვილი — საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე;
• ირაკლი შატაკიშვილი — საქართველოს პარლამენტის იურიდიულ საკითხთა კომიტეტის თავმჯდომარის მოადგილე;
• მაკა ბოჭორიშვილი — საქართველოს პარლამენტის ევროპასთან ინტეგრაციის კომიტეტის თავმჯდომარე;
• ანრი ოხანაშვილი — საქართველოს პარლამენტის იურიდიულ საკითხთა კომიტეტის თავმჯდომარე;
• დავით მათიკაშვილი — საქართველოს პარლამენტის იურიდიულ საკითხთა კომიტეტის თავმჯდომარის პირველი მოადგილე;
• სალომე ქურასბედიანი — საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის მოადგილე;
• თენგიზ შარმანაშვილი — საქართველოს პარლამენტის თავდაცვისა და უშიშროების კომიტეტის თავმჯდომარის მოადგილე;
• სოზარ სუბარი — საპარლამენტო ჯგუფის, ხალხის ძალის თავმჯდომარე;
• ფრიდონ ინჯია — საპარლამენტო პოლიტიკური ჯგუფის, ევროპელი სოციალისტების თავმჯდომარე;
• შალვა კერესელიძე — საპარლამენტო პოლიტიკური ჯგუფის, საქართველოსათვის წევრი;
• ნინო შავგულიძე — საქართველოს პარლამენტის თავმჯდომარის კაბინეტის უფროსის მოადგილე, კომისიის მდივანი.

რა ფუნქცია აქვს კომისიას: საქართველოს პარლამენტის რეგლამენტის თანახმად, საყოველთაო-სახალხო განხილვის საორგანიზაციო კომისია საქართველოს კონსტიტუციური კანონის პროექტის განხილვის დაწყებიდან ერთი თვის განმავლობაში განიხილავს საკონსტიტუციო ცვლილებებთან დაკავშირებულ მასალებს და განხილვიდან ერთი თვის შემდეგ ადგენს შემაჯამებელ ოქმს.

• კომისია მართავს შეხვედრებს საქართველოს სხვადასხვა რეგიონში.

წინაისტორია: 29 თებერვალს მამუკა მდინარაძემ განაცხადა, რომ ქართულმა ოცნებამ მიიღო გადაწყვეტილება, მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".

• "არატრადიციული ცხოვრების წესის მიზანმიმართული პროპაგანდა არის ის, რასთან დაპირისპირებაც არის ჩვენი პასუხისმგებლობა ქართული საზოგადოების და მისი მომავლის წინაშე", — განაცხადა მდინარაძემ.
• 1-ელ მარტს საქართველოს პრემიერ-მინისტრის ირაკლი კობახიძემ განაცხადა, რომ თუ "ლგბტ პროპაგანდის" ამკრძალავ კანონპროექტში მთავრობის ჩართულობა გახდება საჭირო, კანონპროექტის მომზადებაში ჩაერთვებიან.
• 2 მარტს, ქართული ოცნების თავმჯდომარემ ირაკლი ღარიბაშვილმა თქვა, რომ საქართველოს მოსახლეობის 90% მიიჩნევს, რომ "აუცილებელია შვილების, შვილიშვილების, ახალგაზრდა თაობის დაცვა ამ მავნებელი ანტიეროვნული, ანტიადამიანური ლგბტ პროპაგანდისგან".

25 მარტს ცნობილი გახდა რა წერია "ოჯახური ღირებულებებისა" და "არასრულწლოვანთა დაცვის" შესახებ კანონპროექტში.

ასევე, წაიკითხეთ: რა წერია ოცნების ჰომოფობიურ კანონპროექტში, რომელიც მდინარაძემ წარადგინა