მოკლედ: ქართული ოცნების თავმჯდომარე ირაკლი ღარიბაშვილი იზიარებს მმართველი პარტიის მისწრაფებას, მოამზადოს მორიგი ანტიდასავლური და ჰომოფობიური კანონპროექტი, რომელიც კრემლის პრინციპებს იმეორებს. მისი თქმით, საქართველოს მოსახლეობის 90% ისეა განწყობილი, რომ "აუცილებელია შვილების, შვილიშვილების, ახალგაზრდა თაობის დაცვა ამ მავნებელი ანტიეროვნული, ანტიადამიანური ლგბტ პროპაგანდისგან".

  • "მთელ მსოფლიოში მიმდინარეობს აღვირახსნილი კამპანია, აღვირახსნილი პროპაგანდა. ბაღებში, სკოლებში მიჰყავთ ტრანსგენდერები, ბავშვებს აჩვენებენ მათ და ეუბნებიან, რომ თუ არ მოგწონთ თქვენი სქესი შეგიძლიათ შეიცვალოთ", — განაცხადა ღარიბაშვილმა მედიასთან.

დეტალები: ღარიბაშვილის თქმით, მან პირველმა ისაუბრა ინიციატივაზე, რომელიც უკავშირდებოდა ქორწინების დეფინიციის განსაზღვრას კონსტიტუციაში, მოგვიანებით კი, 2017 წელს, კონსტიტუციაში განისაზღვრა ქორწინების დეფინიცია, როგორც "ქალსა და მამაკაცს შორის ურთიერთობა".

  • "ჩვენ ვართ კონსერვატიული საზოგადოება მრავალსაუკუნოვანი კულტურით, ღირებულებებით, ამიტომ, ამას სჭირდება სწორი გააზრება და სწორი დაცვა. სწორი დაცვა სჭირდება ჩვენ საზოგადოებას ბავშვებს და ზოგადად, ჩვენს ღირებულებებს", — თქვა ოცნების თავმჯდომარემ.

კონტექსტი: 29 თებერვალს, ცნობილი გახდა, რომ ოცნება მზად არის, მოამზადოს მორიგი ანტიდასავლური და ჰომოფობიური კანონპროექტი, რომელიც კრემლის პრინციპებს იმეორებს.

  • საპარლამენტო უმრავლესობის ლიდერმა მამუკა მდინარაძემ განაცხადა, რომ ქართულმა ოცნებამ მიიღო გადაწყვეტილება მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".
  • 1-ელ მარტს საქართველოს პრემიერ-მინისტრმა ირაკლი კობახიძემ თქვა, რომ თუ "ლგბტ პროპაგანდის" ამკრძალავ კანონპროექტში მთავრობის ჩართულობა გახდება საჭირო, კანონპროექტის მომზადებაში ჩაერთვებიან.
  • კობახიძის თქმით, მას ესმის საპარლამენტო უმრავლესობის შეშფოთება "ლგბტ პროპაგანდასთან" დაკავშირებით, რადგან "საპარლამენტო უმრავლესობას სურს საზოგადოების დაცვა ასეთი პროცესების შესაძლო განვითარებისგან საქართველოში".

მსგავსი: "პუტინი აფინანსებს ლგბტ თემსაც და რადიკალებსაც" — რას ამბობდა მდინარაძე 2021 წელს და რას ამბობს ახლა

გაიგე მეტი: ევროპისკენ სვლა ირაკლი კობახიძის პირობებში? — რას ველოდოთ