მოკლედ: საქართველოს პრემიერი მინისტრის ირაკლი კობახიძის თქმით, თუ "ლგბტ პროპაგანდის" ამკრძალავ კანონპროექტში მთავრობის ჩართულობა გახდება საჭირო, კანონპროექტის მომზადებაში ჩაერთვებიან.

  • "თუ იქნება საჭირო მთავრობის ჩართულობა, არ ვიცი, როგორ, რა ფორმით, მაგრამ შეიძლება, ჩვენც მივიღოთ ასეთ რამეში მონაწილეობა", — განაცხადა მედიასთან ირაკლი კობახიძემ.

დეტალები: კობახიძის თქმით, მას ესმის საპარლამენტო უმრავლესობის შეშფოთება "ლგბტ პროპაგანდასთან" დაკავშირებით, რადგან "საპარლამენტო უმრავლესობას სურს საზოგადოების დაცვა ასეთი პროცესების შესაძლო განვითარებისგან საქართველოში".

  • იმავე გზავნილებით ხდებოდა ანალოგიური კანონის მიღება რუსეთში. დუმაში "გეი პროპაგანდის" აკრძალვის შესახებ კანონი წლების წინ მიიღეს.
  • "კანონპროექტი უნდა მომზადდეს, საქართველოს კონსტიტუციის მეორე თავის (ადამიანის ძირითადი უფლებების) პრინციპების შესაბამისად, ესაა ჩემთვის მთავარი განმსაზღვრელი პრინციპი", — აღნიშნა კობახიძემ.

გაიგე მეტი: ევროპისკენ სვლა ირაკლი კობახიძის პირობებში? — რას ველოდოთ

კონტექსტი: გუშინ, 29 თებერვალს, ცნობილი გახდა, რომ ოცნება მზად არის, მოამზადოს მორიგი ანტიდასავლური და ჰომოფობიური კანონპროექტი, რომელიც კრემლის პრინციპებს იმეორებს.

  • საპარლამენტო უმრავლესობის ლიდერმა მამუკა მდინარაძემ განაცხადა, რომ ქართულმა ოცნებამ მიიღო გადაწყვეტილება მოამზადოს კანონპროექტი, რომელიც საზოგადოებას "ფსევდოლიბერალური იდეოლოგიისგან და მისი გარდაუვალი მავნე შედეგებისგან დაიცავს".
  • მდინარაძის თქმით, "არატრადიციული ცხოვრების წესის მიზანმიმართული პროპაგანდა არის ის, რასთან დაპირისპირებაც არის ჩვენი პასუხისმგებლობა ქართული საზოგადოების და მისი მომავლის წინაშე", მისივე თქმით, ყველა "ვინც ამ ღირებულებების წინაშე პასუხისმგებლობას გრძნობს", უნდა ჩაერთოს კანონპროექტის შექმნაში და მხარი დაუჭიროს მას.
  • მამუკა მდინარაძემ აღნიშნა, რომ კანონპროექტი უახლოესი 2 კვირის განმავლობაში მომზადდება და დაინიციირდება პარლამენტში.

მსგავსი: ქართული ოცნება ჰომოფობიურ რიტორიკას ამძაფრებს