მოკლედ: ქალთა საკითხებზე მომუშავე ორგანიზაციები გმობენ ქალთა მიმართ დისკრიმინაციული და პარლამენტარის ეთიკასთან შეუთავსებელი ენის გამოყენებას.

• ორგანიზაციები საქართველოს პარლამენტს მოუწოდებენ მოახდინოს რეაგირება ქალთა მიმართ ძალადობასა და ღია სიძულვილზე.

დეტალები: ორგანიზაციები აღნიშნავენ, რომ ორი დეპუტატის — ვახტანგ მეგრელიშვილისა და ბექა ოდიშარიას სექსისტური და შეურაცხმყოფელი მიმართვები, ქალთა მიმართ ძალადობასა და სიძულვილს ახალისებს:

• "ეს შეურაცხყოფს ყველა მოქალაქეს, კაცებსა და ქალებს და უარყოფით ზეგავლენას ახდენს ყველა თაობაზე. ამასთან, დიდ ზიანს აყენებს თავად პარლამენტის რეპუტაციას".

ორგანიზაციები აღნიშნავენ, რომ დეპუტატების მიერ ეთიკის კოდექსის დარღვევის მიუხედავად, პარლამენტის დღის წესრიგში არ დგას კოდექსის დამრღვევ პარლამენტართა მიმართ შესაბამისი პასუხისმგებლობის დაკისრების საკითხი.

• "ეს არ არის პარლამენტში ქალთა დისკრიმინაციის თუ შეურაცხყოფის პირველი შემთხვევა. თითოეულ ფაქტზე შესაბამისი ზომების მიუღებლობა იწვევს დაუსჯელობის სინდრომს, რაც, პრაქტიკიდან გამომდინარე, მსგავსი შემთხვევების განმეორების საფუძველია", — ნათქვამია განცხადებაში.

კონტექსტი: გუშინ, 3 აპრილს, ოცნების დეპუტატმა, ბექა ოდიშარიამ, პარლამენტის სხდომაზე, სადაც დაჩქარებული წესით გენდერული კვოტირების გაუქმებას განიხილავდნენ, ქალ დეპუტატებს შეურაცხყოფა მიაყენა და შეაგინა: "ეს არის მოუტ***ლი ქალების სინდრომი. კაცი მაინც იყო, რომ გითხრა, მტყუანის დედა ვატირე", — თქვა მან.

• ოდიშარიას ბოდიშის მოხდას სთხოვდნენ, მან კი თქვა, რომ მისი "აღშფოთება არ იყო დამისამართებული არც ერთი კონკრეტული ფიზიკური პირის მიმართ, არც ქალის და არც კაცის მიმართ".

გუშინვე, სხდომაზე, სექსისტური განცხადება გააკეთა ვახტანგ მეგრელიშვილმა:

• "მე ახლა მაგრად გამისწორდებოდა, რომ უმრავლესობა ქალები იყოთ [პარლამენტში], ბევრად უფრო სასიამოვნოდ გავატარებდი დროს საპირისპირო სქესის ადამიანებთან, რა ვქნა?! ძალით ხომ ვერ მოვიყვან? ჩემი სიამოვნებისთვის ძალით რომ შემეძლოს ქალების მოყვანა, ხომ სხვა სახელს დამარქმევდით, არა? ჩემი სიამოვნებისთვის ჰარემს ხომ არ გავაკეთებ?"

გაიგე მეტი: სამადაშვილი მოითხოვს, ოდიშარიამ და მეგრელიშვილმა ნარკოლოგიური შემოწმება გაიარონ

რას ამბობს კანონი: საქართველოს პარლამენტის წევრის ეთიკის კოდექსის თანახმად, პარლამენტის წევრმა პატივი უნდა სცეს და აღიაროს კაცებისა და ქალების თანაბარი უფლებები, პატივისცემით უნდა მოექცეს სხვა პარლამენტის წევრებს სქესის მიუხედავად.

• დაუშვებელია ღირსების შემლახველი, უხამსი, სექსისტური, დისკრიმინაციული გამოსვლა, მიმართვა, მოქმედება და სიძულვილის ენის სხვაგვარი გამოყენება.