მოკლედ: ოპოზიციონერი დეპუტატი, სალომე სამადაშვილი მოითხოვს, რომ ოცნების დეპუტატმა ბექა ოდიშარიამ და გირჩის ერთ-ერთმა ლიდერმა, ვახტანგ მეგრელიშვილმა ნარკოლოგიური შემოწმება გაიარონ.

  • ამ მოთხოვნით სამადაშვილმა დღეს, 4 აპრილს, პარლამენტის სხდომაზე, შალვა პაპუაშვილს მიმართა.

დეტალები: სამადაშვილმა ბექა ოდიშარიას მიერ გუშინ, 3 აპრილს, გაკეთებულ სექსისტურ და უხამს განცხადებას "წარმოუდგენლად შეურაცხმყოფელი" უწოდა:

  • "ამ ორმა ადამიანმა დღესვე გაიაროს ნარკოლოგიური შემოწმება, რომ ქართველმა ხალხმა იცოდეს, ქართველ ქალებს პარლამენტში ფხიზელ მდგომარეობაში ებრძვიან უმრავლესობის წევრები".

კონტექსტი: გუშინ, ოცნების დეპუტატმა, ბექა ოდიშარიამ, პარლამენტის სხდომაზე, სადაც დაჩქარებული წესით გენდერული კვოტირების გაუქმებას განიხილავდნენ, ქალ დეპუტატებს შეურაცხყოფა მიაყენა და შეაგინა: "ეს არის მოუტ***ლი ქალების სინდრომი. კაცი მაინც იყო, რომ გითხრა, მტყუანის დედა ვატირე", — თქვა მან.

  • ოდიშარიას ბოდიშის მოხდას სთხოვდნენ, მან კი თქვა, რომ მისი "აღშფოთება არ იყო დამისამართებული არც ერთი კონკრეტული ფიზიკური პირის მიმართ, არც ქალის და არც კაცის მიმართ".

გუშინვე, სხდომაზე, სექსისტური განცხადება გააკეთა ვახტანგ მეგრელიშვილმა:

  • "მე ახლა მაგრად გამისწორდებოდა, რომ უმრავლესობა ქალები იყოთ [პარლამენტში], ბევრად უფრო სასიამოვნოდ გავატარებდი დროს საპირისპირო სქესის ადამიანებთან, რა ვქნა?! ძალით ხომ ვერ მოვიყვან? ჩემი სიამოვნებისთვის ძალით რომ შემეძლოს ქალების მოყვანა, ხომ სხვა სახელს დამარქმევდით, არა? ჩემი სიამოვნებისთვის ჰარემს ხომ არ გავაკეთებ?"

რედაქციისგან: რატომ გვჭირდება გენდერული კვოტირების პოლიტიკა — პოზიციები და ანალიზი